TV-krim

Mone Celin Skrede

mone@dagogtid.no

– Han er ein tidlegare dømd drapsmann og kan vere farleg, seier rollefiguren til Jakob Oftebro i traileren til den nye krimserien Monster, før han føreslår å ta ein prat med den mistenkte.

Vi er inne på eit typisk politikontor, og skal få følgje handlinga, innspelt i Finnmark, i sju episodar.

– Det er greitt, det, seier Bjørn Sundquists karakter.

Snart kan desse to visast på skjermar i over 31 millionar husstandar i USA. Fleire land har meldt seg interesserte, ifølgje dramasjef i NRK, Ivar Køhn. Monster har premiere i Noreg midt i oktober, og handlar om ei mordetterforsking i ei lita fiktiv bygd i Nord-Noreg. Politibetjent Hedda Gilbert, som er lokal, må etterforske det som viser seg å vere ei massegrav, saman med Jakob Oftebros karakter, Joel Dreyer.

Beste TV-fiksjon

Tidleg i september vart det kjent at den nye serien er nominert til den prestisjetunge prisen Prix Europa for beste TV-fiksjon.

– Juryen har svært faglege og kritiske diskusjonar før han kjem fram til ei avgjerd, så det er med litt skrekkblanda fryd, sa produsent Lasse Greve Alsos til NRK.

Han og teamet hans tevlar med endå ein norsk serie om prisen, nemleg Valkyrien med Sven Nordin, Ellen Birgitte Winther og Pål Sverre Hagen i hovudrollene.