Unødvendige varer

Eg visste at president Donald Trump og Elon Musk hadde gjort umåteleg skade på verdsmarknaden for Tesla-bilar, men kva hadde ukrainske bøker med politikken til Trump å gjere?

– Etter skandalen i Det ovale kontoret og den offentlege audmjukinga av Zelenskyj som Trump og Vance sytte for, slutta ukrainarane å kjøpe bøker, forklarte Oleksandr.

– Og ikkje berre bøker, men mange andre ting du ikkje kan leve utan. Bøker vart i hovudsak kjøpte av aktive borgarar, og skandalen i Washington råka denne delen av folkesetnaden hardast. Dei vart deprimerte, og ein deprimert person kjøper ikkje unødvendige ting.

– Du veit, alkoholsalet i Ukraina har auka sidan Trump vart president, vart eg fortald dagen etter av Oleksij Volkov.

Volkov er ekspert på alkoholmarknaden og ein ihuga elskar av godt øl.

– Denne utviklinga er sjølvsagt bra for marknaden, men ikkje særleg god for det ukrainske samfunnet, sa han.