TEATER

Den Nationale Scene

Knut Nærum:

Henrik Ibsens samlede verker på 78 minutter

Regi og scenografi: Eirik del Barco Soleglad

Å leike seg hemningslaust med klassikarane har i dei siste åra vore ein eigen sjanger i teateret, vel mest inspirert av den engelske framsyninga med Shakespeare på 90 minutt, som har gått i fleire år i London. Tilsvarande er gjort med Ibsen i Noreg, og den nyaste varianten hadde premiere i Bergen sist helg. I framsyninga på DNS’ Lille Scene har den evnerike Eirik del Barco Soleglad regissert ein skodespelartrio – Kjersti Elvik, Tormod Løvold og Kristian Berg Jåtten – til eit nettopp hyperaktivt og heseblesande sceneshow, der ein rett nok passar på å få nemnt alle verka til Henrik Ibsen, men der innhaldet elles går ut på å servere dagsaktuelle revypoeng.

Det er alltid moro å sjå skodespelarar som kan faget sitt, og skape ein karikert situasjon på få sekund. Dei beste innslaga minner oss òg om satirens gylte verdi: det å spøke bort ting ein hittil berre har tatt frykteleg alvorleg. Men det kunne vore mykje meir å hente om ein ville fokusere på Ibsen med humoristisk vri. Og Ibsen er faktisk tidlaus, medan denne framsyninga truleg er utdatert i neste månad, kan hende alt i morgon.

Bent Kvalvik