Perlemorskyer over Munch

Edvard Munch var inspirert av perlemorskyer då han måla «Skrik», meiner norske meteorologar. «Skrik» har fascinert sidan det vart måla for hundre år sidan. No får norske meteorologar internasjonal merksemd etter at dei har lansert teorien om at Munch fekk inspirasjon til å måle himmelen etter at han hadde sett perlemorskyer over Oslofjorden. Funna blei presenterte i Wien denne veka. Meteorolog Svein M. Fikke kika ut glaset ein kveld i førjulstida 2014 då raude og gule bylgjeforma perlemorskyer ovra seg på himmelen. Eureka, ikkje så heilt ulikt den himmelen vi ser i «Skrik», tenkte meteorologen.

«Fargespelet utvikla seg heile tida både i fargar og intensitet. Og då eg la bilda inn på datamaskinen min, samanlikna eg det med himmelen i ’Skrik’. Både fargespelet og bølgjeforma var lik,» seier han til NRK.

«Eg trur ein er på villspor når ein studerer himmelen i ’Skrik’, og forklarar det med eit meteorologisk fenomen. Munch var ikkje ein målar som presist kopierte naturen han såg,» er svaret frå NRKs kunstkritikar, Mona Pahle Bjerke.

UNESCO-støtte i 2017

Den norske UNESCO-kommisjonens tilskotsordning deler ut pengar til gode prosjekt i ulike kategoriar, som ytringsfridom, berekraftig utvikling og immateriell kulturarv. Samla søkjarsum i 2017 var omlag 14 millionar, medan den totale summen til utdeling er litt under 3,2 millionar kroner. 22 prosjekter får støtte, mellom desse er Høgskolen i Oslo og Akershus, Institutt for journalistikk og mediefags «Ytringsfrihet og journalisters sikkerhet» (400 000 kr) og Nobels Fredssenters «Fordomsbar» i utstillingen «Omveier»: Møte- og debattarena» (295 000 kr).

Ingen musikk frå Prince

Førre veke melde Dag og Tid at det skulle koma ein ny EP med tidlegare uutgjevne innspelingar frå popstjerna Prince, Deliverance – ei utgjeving med seks låtar artisten spela inn mellom 2006 og 2008. Plata skulle koma på dødsdagen hans, som var førre fredag. Men no har ein dommar sett strek over utgjevinga, som produsenten i platestudioet til Prince, Ian Boxill, står bak. Dødsbuet etter Prince, som blir administrert av syskena hans, har nemleg sett seg på bakbeina, og bede ein domstol i Minnesota om å ta affære. Boxill prøver å misbruke låtane som han urettmessig sit på, heiter det i sakspapira til søksmålet.

ronny@dagogtid.no