– Har du høyrt at det finst Prime på Ringo i Sauda? Me må køyre!

Sauda er tre biltimar unna. Prime er ein skamdyr energidrikk, og det er son min på ti år som vil ha han. Drikken med dei sterke fargane og det søte innhaldet kjem frå USA og har teke av blant smågutar i heile verda.

Ei flaske kostar 149 kroner, smaken er «sjukt god, og alle burde smake», ifølgje nære kjelder. Kjeldene seier også at drikken er utseld i heile landet, om ikkje i heile verda, utanom i Sauda, då.

Prime vart lansert av YouTube-superstjernene Logan Paul og KSI, og dermed var det gjort. Utan at foreldra hadde fått med seg noko som helst, var sportsdrikken blitt det store samtaleemnet blant verdas pre-tenåringar.

Prime hydration, ein verdsberømt sportsdrikk som blir drukken meir framføre datamaskinen enn etter trening.

Foto: Tbf69 / Wikipedia

Det er fasinerande korleis eit sukkervatn som ikkje eingong inneheld noko så spanande som koffein, kan ta av på denne måten.

For ti år sidan var det dei vaksne som gjekk i fella, då med drikken RingerDrink+. Det må faktisk vere lov å kalle det «felle» når væska kostar 300 kroner literen. Salet tok spesielt av i vekene før Birkebeinerrennet. At ingen faktisk likte innhaldet, som truleg hadde noko å gjere med at RingerDrink+ eigentleg var meint for intravenøs bruk, stoppa dei ikkje.

Ernæringsfysiologane kalla drikken for lureri. Farris, banan eller bollar kunne gjere same nytta. Og etter ei stund gjekk også ryktet om at ein kunne lage ein like effektiv drikk heime.

Maren Bø

Maren Bø er idrettspedagog og frilansskribent.