Fransk val

Jon Hustad

jon@dagogtid.no

Fransk valkamp er ikkje heilt som norsk valkamp. Gaullisten Francois Fillon byrja bra, så bra at dei fleste rekna med at sigeren var sikker. Men så skjedde det som plar skje i Frankrike: Avisene fann ut at han var korrupt, slik som dei fleste andre franske rikspolitikarar. Ein treng vel ikkje seia det, Fillion liker ikkje alle skuldingane som kjem mot han. Den fyrste skuldinga, som ser ut til å vera rett, er at han betalte kona for ei «falsk» stilling som assistent i parlamentet, den andre skuldinga var at han hadde finansielle band til Russland.

Så kva gjer du når du vert skulda for korrupsjon og ser ut til å vera skuldig? Du går til åtak og hevdar du er utsett for eit komplott. Onsdag denne veka gjekk Fillion til åtak på den sittande sosialistregjeringa og hevda at ho stod bak alle lekkasjane om korrupsjon. Ja, så langt gjekk han at han hevda at lekkasjane var «godt planlagde og organiserte». «Merkeleg nok held sosialistpartiet, herr Macron og herr Holland fram med å koma med desse falske avsløringane», sa han òg, med referanse til Emmanuel Macron, som ser ut til å vinna, og president Francois Hollande.

Sytinga hjelper neppe. Meiningsmålinga på onsdag syner at Macron og Marine Le Pen båe ligg an til å få 26 prosent av stemmene, medan Fillon får 17 prosent. I andre runde, som Fillion, truleg ikkje får deltaka i, vil dimed Macron vinna suverent om meiningsmålingane er rette.

Kona tente godt

Fillion har aldri heilt forklart kvifor han ikkje er korrupt og kva det er med skuldingane som er falskt. Dokumenta som fransk presse har fått tak i, syner at han betalte kona og to av borna minst 800.000 euro for å assistera han i parlamentet, men få om nokon kan hugsa å ha sett familien hans i arbeid i parlamentet. Den 28. mars må kona møte i forhøyrsretten, som sette Fillion under offentleg gransking den 14. mars.

Det er òg mistanke om at Fillion har forfalska dokument som skal syna at kona har arbeidd for han. Om dette er rett, har han både underslege pengar og kome med falsk forklaring. Pierre Cornut-Gentille, som er advokaten til Fillion, avviser sjølvsagt alle skuldingar, og seier til The Daily Telegraph at «sidan arbeidet Penelope Fillion har gjort for ektemannen, har vore reelt, er sjølvsagt alle dokument som syner dette, ekte».

Det er satire- og vekeavisa Le Canard, som vert rekna for å vera den beste og mest truverdige avisa i Frankrike, som står i spissen for avsløringane. Det siste frå den fronten er at ein libanesisk milliardær skal ha betalt eit selskap som er eigd av Fillion 50.000 dollar for å få han til å møta Vladimir Putin og Patrick Pouyanne, som er leiar i oljeselskapet Total.

Kva var svaret frå Kreml på skuldingane? Ja, de gissar rett: «falske nyhende». Om dette held fram, finn nok Le Canard ut at Macron heller ikkje har reint mjøl i posen.