Den norske byen som i høgast grad har vorte assosiert med vatn, er Arendal. Ein gong, då Arendal var ein framskoten sjøfartsby, var sørlandsbyen kjend under namnet «Nordens Venedig». Arendal hadde ikkje kunstige kanalar slik nederlandske byar har det, men låg på sju øyar som var knytte saman med bruer. Det var altså vatn på alle kantar.

Plassen framfor Arendal rådhus og kulturhuset, Sam Eydes plass, og Kanalplassen, låg ein gong og glitra i vatn. Men desse sunda, som andre sund i byen, vart fylte att i 1930- og 40-åra. Bilen, ikkje båten, var det nye framkomstmiddelet.

Det finst ein eigen kamporganisasjon for vatnet i Arendal – Kanalselskapet – som jobbar for at Arendal sentrum skal få attende kanalane innan byjubileet i 2023, og dei ser ei von i kommuneplanen, for der står det at ei opning av kanalen «skal kunne komme»:

Dag og Tid ringjer Michael Fuller-Gee, byplanleggjar i kommunen, og han har gode nyhende:

– Vi skal i gang med ein ny sentrumsplan som nettopp vil innehalde ei utgreiing av finansiering og konsekvensar av ei gjenopning av kanalane. Meininga er at arbeidet skal ta til rett etter sumarferien. Det gjeld ikkje alle dei gamle kanalane, som Kanalskapet vil, men strekninga frå Pollen til Kittelsbukta, fortel Fuller-Gee.

– Er miljøomsyn viktige i denne samanhengen?

– Ja, det har kome inn som eit nytt, viktig moment frå teknisk etat, så her gjeld ikkje berre estetiske argument. Ein open kanal gjennom sentrum vil betre ta unna den auka mengda regn vi vil få i framtida.