Jazz

Espen Berg Trio:

Bølge

Espen Berg, piano, BárDur Reinert Poulsen, bass, Simon Olderskog Albertsen, trommer. ODIN ODINCD9559

Espen Berg Trio gav i 2015 ut Mønster på det japanske platemerket Blue Gleam. To år etter kom oppfølgjaren Bølge. No er sistnemnde ute på Odin, og godt er det. Båe platene er verde å lytta til, men trioen har teke nye steg med årets utgjeving.

Pianotriokonseptet har alltid hatt ein spesiell plass i jazzsoga, men har hatt eit oppsving i både norsk og internasjonal jazz dei siste 20 åra. Esbjørn Svensson Trio, Bad Plus, Tord Gustavsen, Helge Lien og In The Country har alle medverka til dette, men det kunstnarleg tyngste bidraget har standardtrioen til Keith Jarrett kome med.

Melodiske basslinjer

Espen Berg Trio har med Bølge teke plass i det gode selskapet. Stings «Hounds of Winter» blir etterfølgt av ni låtar signerte Berg. Både låtmaterialet og uttrykket til trioen plasserer dei i den meir melodiøse delen av hovudstraumen. Trioen utmerkjer seg først og fremst med intrikat og virtuost samspel og ditto solistiske bidrag. Spesielt fascinerande er det å lytta til den framskotne plassen bassen har i lydbiletet både i å presentera temaet som til dømes i «Matrix» og i den gjennomgåande melodiske forma basslinjene får.

Sterk lytteoppleving

Berg er eit oppkome av idear, og teknikken set vide grenser for kva han er i stand til å uttrykkja. Sagt på ein annan måte: Her er langt mellom klisjeane. Olderskog Albertsen spelar trommer på eit perkusivt vis. Slik kombinerer han komprolla med spanande fargelegging. Uttrykket kan vera intenst rytmisk og luftig på same tid. Ei sterk lytteoppleving frå først til sist.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.