Jazz

Gunhild Seim, Marilyn Crispell og David Rothenberg:

Grenseland

Gunhild Seim, trompet og elektronikk; Marilyn Crispell, piano, vokal og perkusjon; David Rothenberg, klarinettar og elektronikk
DROLLEHÅLÅ RECORDS DH9607

Gunhild Seim (44) er ein nestor i norsk jazz. Ho er ein av dei mest profilerte kvinnelege instrumentalistane på jazzfeltet. Ho har i over ti år levert innspelingar i eige namn som har hausta lovord frå den internasjonale fagpressa. Dette gjeld både innspelingane med bandet hennar, Time Jungle, og tingingsverket til Vossa Jazz 2012 Story Water. I tillegg har ho vore ein krumtapp i grunnlegginga av stavangerinstitusjonen Kitchen Orchestra.

Dette er ikkje første gong Seim og Crispell samarbeider. Sistnemnde var gjest på Time Jungle-innspelinga Elephant Wings. I samarbeid med den amerikanske filosofen og jazzmusikaren David Rothenberg har dei laga musikk som på meisterleg vis sameiner elektronikk og akustiske instrument. Rothenberg har i lang tid vore oppteken av dyrelydar som musikk, og har duettar med trast og australsk lyrehale på samvitet. Dette høyrer ein att i musikken.

Kollektiv

Plata er sett saman av åtte kollektivt komponerte låtar, og av desse er «Tundra», «Onyx» og «Grenseland» improvisatoriske tours de force. Førstnemnde er eit høgdepunkt med alle sine skiftande stemningar og sitt rike klangregister. Crispell er heile vegen i sentrum med kombinasjonen piano og tamburin og vokal, og i tillegg får me servert ein varm, men likevel avmålt samtale mellom klarinett og trompet.

Nye gullkorn

På fleire av låtane har dei lagt ein diskré puls i botnen som gjev spenning til den musikalske konversasjonen som skjer oppå dette fundamentet. Spesielt fascinerande er samspelet mellom Crispell og Seim i «Flame». Ved kvar gjennomspeling har eg oppdaga nye gullkorn. Denne plata har framleis meir å gje.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.