Jazz

SVEIN RIKARD
MATHIESEN:

Monsters

Svein Rikard Mathiesen, gitar; Erik Kimestad Pedersen, trompet (4,6); Søren Gemmer (3,5,6,7) og William Larsson (1,2,3), piano og Wurlitzer; Paul Hinz, bass; Andreas Frydland, trommer.
CURLING LEGS CLP CD 160

Svein Rikard Mathiesen er ingen barrikadestormar, men han lagar musikk som ein legg merke til. Det meste blir spelt i eit tradisjonelt kvartettformat, og gitarreferansane er tydelege, men dei blir berre diskret krydder i ein musikalsk gryterett som har distinkte og delikate smakar.

Nye låtar

København har vore base for Mathiesen, og han har jobba med same band, Somebody’s Quartet, i fleire år. Målet hans har vore å skriva litt nytt til kvar turné, slik at repertoaret frå debutplata Copenhagen Diaries gradvis kunne få avløysing. Låtane er ein tvillaus kvalitet ved plata, men det er også arrangementa. Truleg er desse utvikla i konsertsamanheng, og i mars 2017 hadde repertoaret funne forma og kunne spelast inn i ei tre dagar lang økt i København.

Den vanskelege andreplata

Mathiesen er hovudsolist og er frampå plata igjennom, men han økonomiserer med plassen, og kora og fine arrangementsdetaljar føyer seg fint i hop. Trompetist Kimestad Pedersen er med på to låtar, og det tilfører lydbiletet velkomen variasjon, og på «Prague» glimtar han verkeleg til. Larsson og Gemmer får sagt sitt på høvesvis «False Summits» og «Monster’s Playground». Mathiesen har meistra utfordringa med den vanskelege andreplata med bravur.

Lars Mossefinn

Lars Mossefinn er frilans kulturarbeidar og fast jazzmeldar i Dag og Tid.