Jazz

MOLECULES & ERLEND SKOMS-VOLL:

Louder Than You

Karoline Wallace, vokal; Jonas Flemsæter Hamre, tenorsaks; Tancred Heyerdahl Husø, trompet; Mathias Marstrander, gitar; Erlend Skomsvoll, piano og orgel; Petter Asbjørnsen, bass; Øyvind Skarbø, trommer.
ØRA FONOGRAM OF121

Det er i Bergen det skjer – også på jazzfronten. Hovudpersonen, vokalist og komponist Karoline Wallace, kjem rett nok frå Stabekk, men ho har budd og verka i Bergen dei siste tre–fire åra, og ho har sett merke etter seg. Molecules har vore hovudprosjektet hennar i det siste, og med dette bandet vann ho talenttevlinga til Nattjazz «Jazzen i sikte» i 2014. I 2016 innleidde dei eit samarbeid med Erlend Skomsvoll, og han er med på plata.

Wallace dreg vekslar på ulike tradisjonar og sjangrar i komponeringa, og ho set gjerne saman ulike melodiske fragment til eit overraskande og forfriskande heile. Arrangementa byr også på ein del fikse grep. Den sakte og svingande «Tip Toe» blir broten opp av nokre korte, kjappe frasar henta frå bopens felleskatalog.

Vokalstilen hennar kan i dei meir eteriske delane av repertoaret minna om Mari Kvien Brunvoll, til dømes i den vakre balladen «That Easy», som også inneheld eit nydeleg gitarkor frå Marstrander. Wallace brukar røysta instrumentalt like gjerne som til tekstformidling.

Bandet leverer både i samspel og solistisk. Skarbøs lause groove kjem så absolutt til sin rett i denne samanhengen, og Asbjørnsen er ein fin makker. Skomsvoll har alltid noko uventa på lager, enten i kompfunksjonen eller i kora, eksempelvis i «Try Not To». Både Hamre og Husø trør til når dei får sjansen, men dette er først og fremst ein lagsiger med Wallace som profilert kaptein.

Lars Mossefinn

Lars Mossefinn er frilans kulturarbeidar og fast jazz-
meldar i Dag og Tid.