Teater Innladet / Traktor / Ringsakeroperaen

Traktor, Lars Erik Holter og Frank
Havrøy:

Testosteron

Komponist: Trond Lindhjem
Regi: Lars Erik Holter
Scenografi: Tore Bjørnstad

Til dei mykje omtala Heddadagane, der teater frå siste sesong rundt land og strand vert mønstra i Oslo, er framsyninga Testosteron no presentert på Centralteatret. Stykket er ein kombinasjon av monodrama for ein mann, songar og skodespelar Frank Havrøy, og musikkdramatisk verk for eit lite orkester. Ensemblet Traktor, som står for den musiserande biten, er eit knippe klassiske musikarar som har funne ein eigen nisje i scenisk samtidsmusikk. Dei to aktøreiningane, skodespelar og orkester, byrjar med å avløyse kvarandre, men går etter kvart i dialog med kvarandre, så skodespelaren tidvis vert songar, og musikarane tidvis vert skodespelarar. Det er ei uføreseieleg og original teaterhending, ramma inn av fengande, ypparleg framførte komposisjonar.

Identitet

Mykje kviler her på energisprøyta Frank Havrøy, som gjennom ein indirekte appellerande tekst, med mange svingar og sidevegar, både i tale og song skal formidle noko om den notidige, mellomaldrande mannens identitetsjakt og ditto -krise.

I starten vart vi kanskje litt skeptiske, i opninga på noko som kunne sjå ut som eit nytt sjølvbiografisk standupshow. (Dei har vi snart fått nok av for ei stund.)

Men etter kvart som denne mannen tek til å fortelje lidenskapeleg om albatrossens enkle og dominante kjærleiksliv, er vi med på reisa frå det generelle til det personlege. Her kjem retteleg ein del morosame, kvikt formulerte poeng i pingpongspelet mellom skodespelar og orkester.

Form

Men det må vedgåast at sekvensen med Morgan Kane i Cowboyland vart for langdryg. Det er grenser for kor morosam ein kan vere på noko som ingen lenger tek på alvor. Og så skjøna vi vel heller ikkje heilt poenget med lausskjegg på dei kvinnelege musikarane.

Mykje talent og idérikdom er eksponert i framsyninga Testosteron, men til sjuande og sist er nok forma meir fascinerande enn innhaldet i denne produksjonen.

Bent Kvalvik

Bent Kvalvik er filmarkivar og fast teatermeldar i Dag og Tid.