JAZZ

Olga och Thoresen:

December Songs

Olga Konkova, piano og Jens Thoresen, gitar.
LOSEN RECORDS LOS 157–2

Fleire juleplater trengst ikkje. Det er greiast å ta fram bunken frå i fjor med kjende og kjære innspelingar når advent snart står for døra. No er det slik at denne bunken ein tek fram år etter år, ikkje alltid har vore den same. Opp gjennom åra har nokre få utgjevingar kome gjennom nålauga.

Atypisk juleplate

Eg vurderer å la December Songs få godkjendstempel og bli teken opp i det eksklusive selskapet. Utgjevinga er ei atypisk juleplate. Den typiske juleplata held seg på den harmonisk smale sti, og melodilinja er aldri langt unna. Ikkje så at ein er i tvil om kva julesongar Konkova og Thoresen spelar, men eksperimenterer gjer dei heile tida. Dei har skrudd saman ein del herlege arrangement, og dei gjev kvarandre rikeleg solistisk rom. Samspelsrøynsle har dei to mellom anna frå storbandet Denada. Det merkast heile vegen.

Godkjend

Alle elleve låtane er mellom dei mest spela, men det er ikkje ein einaste versjon som fekk meg til å tenkja på ei anna innspeling av same låt. I den frie handsaminga av stoffet greier duoen likevel å ta med seg den emosjonelle essensen i komposisjonane. Eg tek eit lite atterhald når det gjeld «Jinglebells». Bjølleklangen er ganske sær. På den andre sida er «Deilig er jorden», som også har eit ganske spesielt arrangement, høgdepunktet på plata. Her er mykje til ettertanke, men peiskosfaktoren er heller låg. Godkjendstempelet er gjeve!

Lars Mossefinn

Lars Mossefinn er frilans kulturarbeidar og fast jazzmeldar i Dag og Tid.

dette er ein test

dette er infotesten