Nynorsk litteraturpris til Brit Bildøen

Brit Bildøen er tildelt Nynorsk litteraturpris 2018 for boka Tre vegar til havet. I grunngjevinga frå juryen heiter det mellom anna: «Tre vegar til havet er mange ting, men først og fremst er det ein modig roman.» Det er Noregs Mållag, Samlaget og Det Norske Teatret som står bak prisen, som er på 30.000 kroner.

I Tre vegar til havet skildrar Bildøen avmakt i møte med byråkratiet og kva desperasjon kan gjere med eit menneske. Samstundes teiknar ho eit urovekkjande bilde av ei tid der fugleartar forsvinn i rasande fart, og der menneske kjenner seg åleine blant sine eigne.

Brit Bildøen debuterte i 1991 med diktsamlinga Bilde av menn og har sidan skrive romanar, barnebøker og essay. Forutan romanen Tre vegar til havet kom i fjor også omsetjinga hennar av Gertrude Steins kultklassikar Alice B. Toklas’ sjølvbiografi.

Fuglesong på britisk singelliste

«Let Nature Sing», som er ei to og eit halvt minutt lang innspeling av fuglesong, debuterte onsdag denne veka på ellevteplass på den offisielle britiske singellista. Organisasjonen The Royal Society for the Protection of Birds har gjeve ut innspelinga for å skape merksemd rundt utryddingstrua fugleartar i Storbritannia. Songen frå 25 ulike fuglar er å høyre på «Let Nature Sing».

Tone Hødnebø får Diktartavla 2019

Diktardagen er eit årleg arrangement der ein norsk lyrikar blir heidra med ei diktartavle. Prisen er eit samarbeid mellom Hardanger folkemuseum og Olav H. Hauge-senteret. Laurdag 8. juni er det Tone Hødnebø som får Diktartavla 2019.

Tone Hødnebø har sidan debuten i 1989 gitt ut seks eigne diktsamlingar og gjendikta Emily Dickinson og den kanadiske poeten Anne Carsons.

– Hødnebø skriv kjenslevare og formsterke dikt som utforskar tankekrafta i poesien. Ho vil difor finne sin velfortente plass på Diktarstigen saman med andre markante norske lyrikarar, seier dagleg leiar Geir S. Netland på Olav H. Hauge-senteret.

Grottedrama blir Netflix-serie

Fotballaget som var fanga i ei grotte i det nordlege Thailand i fjor sommar, har signert ein avtale som gir Netflix retten til historia, melder BBC. Dei tolv gutane frå laget The Wild Boars og trenaren deira vart redda etter 17 dagar nede i grotta. No vil Netflix lage miniserie av den dramatiske hendinga.

bjorntorebroske@gmail.com