Jacobsen på
kortlista

Roy Jacobsen har teke steget frå langlista til den gjæve kortlista over nominerte til The Man Booker International Prize. Jacobsen er nominert med romanen De usynlige. Ifylgje forlaget Cappelen Damm er Jacobsen den fyrste nordmannen som er kommen så langt i nominasjonsprosessen.

København får litteraturhus

Mange europeiske storbyar har litteraturhus, men det har faktisk enno ikkje København fått. No har danskane vitja kulturhusa i Berlin og Oslo, og late seg inspirere:

«Det skal være et levende hus. Vi vil ha åpent daglig. Fra tidlig morgen, hvor man kan komme inn og lese morgenavisen og spise frokost, til kvelden, hvor man kan komme og spise middag. Samtidig kan man snuse rundt i bokhandelen», seier ein av intiativtakarane, Claes Benthien, til bok365. Litteraturhuset Vandkunsten skal opne alt i mai og vil liggje i Nybrogade 28 i Indre By, med utsikt til Christiansborg.

Ny rekord for NFF

NFF (Norsk faglitterær forfatter- og oversetterforening) har i år fått rekordmange søknader. 18. april gjekk fristen ut for å søkje prosjektstipend, treårig arbeidsstipend for frilansforfattarar og eittårig arbeidsstipend for frilansomsetjarar frå det faglitterære fondet.

NFF har mjuka opp reglane – etter intens intern debatt – og responsen var stor: om lag 800 søknader frå over 1000 stipendsøkjarar. Søkjarane er fleire og yngre, men NFF fortel òg at psykologi og yoga ser ut til å vera ein trend i søkjarbunken.

ronny@dagogtid.no