Humor

Hallgrim Berg

Humor er eit kraftig våpen, fordi dette maktmiddelet slår inn i breie målgrupper landet rundt – med uthenging av einskildmenneske og minoritetar, antisemittisme, sjikane og fælsleg språkbruk – samstundes som kritikarane blir avvæpna. Kvar gong nokon går over streken og einkvan ute i samfunnet kjem med kritikk, høyrer me omkvedet: «Vi mente det ikke bokstavelig, det var jo bare satire, og det bør man jo tåle…»

Lars Kolbeinstveit likar tydelegvis ikkje at professor Jan Inge Sørbø og underteikna har våre tankar om tvilsam kvalitet i dagens humorutvikling. I ein lett doserande stil forklarar han at folk har ulik smak, og det er det.

Sjølv dreg han overraskande fram showet til komikarparet Tusvik og Tønne. Det er ikkje måte på kva for menneskeleg klokskap han tolkar ut frå aktørane. Langt på veg opphøgjer han Tusvik til ein ruvande konservativ talsperson for truskap og familie.

Eg veit ikkje kor langt Kolbeinstveit har samvit til å strekkje den liberale syltestrikken sin, etter at seriøse presseorgan har omtalt TT-showet. Eg har ikkje sett det enno, er førebels berre informert om nokre av verkemidla: stygge spark, vrenging av privatliv, uthenging av ein sambuar, store dosar verbal «fitte» og med eigne vagina- og analopningar utbretta på storskjerm. Dette er liberalt og festleg, og eg er verkeleg spent på kor vidt det åndelege utbytet tilsvarar billettprisen.

Eg er samd i at humor er eit manggreint fenomen, frå Nytt på Nytt og standup til folkeleg litteratur og gode skrøner under elgjakta. Gjennomgåande er det komikk og frigjerande latter me søkjer. Helst godlynt, ikkje menneskefiendtleg.

Filosofen Kolbeinstveit har difor rett i ein ting: Kritikarane Sørbø og Berg er mest glade i humor dei sjølve likar!

Hallgrim Berg er forfattar og kulturist.