Elektronika

Pauline Anna
Strom:

Trans-Millenia Music

RVNG Records

Paulina Anna Strom blei fødd blind. Etter ein barndom fyld med lydbøker og klassisk musikk, flytta ho tidleg på 80-talet til San Francisco, der ho begynte å lage musikk med ei stadig voksande samling syntar og andre elektroniske duppedittar. Byen var på den tida sentrum for såkalla new age- og ambient-musikk, men Strom var noko av ein outsider, og fann inspirasjonen hos europearar som Klaus Schulze, Tangerine Dream og Brian Eno.

For tida bur ho saman med ein iguan og jobbar som avstandsreikihealer. Ho måtte nemleg selje musikkutstyret mot slutten av 80-talet, og har ikkje laga musikk sidan. Stroms originale LP- og kassettutgjevingar er ikkje lette å få fatt i, og berre få enkeltspor har dukka opp på sporadiske, obskure antologiar. Godt er det at ho no har blitt løfta fram frå gløymsla og tildelt ein velfortent plass blant dei mange kvinnelege elektroniske musikkpionerane; nokre andre døme er Doctor Who-komponisten Delia Derbyshire, Eliane Radigue, som spelte for fullt hus under Ultima-festivalen i Oslo i fjor, og Pauline Oliveros.

Trans-Millenia Music er ei saumlaus, draumeaktig samling av 13 spor frå Stroms sju utgjevingar mellom 1982 og 87, med framifrå, oppreinska lyd. «I hope it gives listeners some insight and further expands their consciousness in a way», sa ho i eit nyleg intervju, og nett slik kjennest lytteopplevinga. Lat oss berre vone at vi får høyre meir frå henne – nytt eller gamalt.

Rasmus Hungnes

Rasmus Hungnes er musikar og fast platemeldar i Dag og Tid.