Rock

They Might Be Giants:

I Like Fun

Idlewild Recordings

Det New York-baserte alternativrockebandet They Might Be Giants består hovudsakleg av John Flansburgh og John Linnell, som har halde den småpunkete, godlyndte og intelligente musikkproduksjonen sin gåande sidan 1982. I Like Fun er det tjuande albumet deira.

Variert

Stilistisk er I Like Fun variert, men samanhengande. Opningssporet «Let’s Get This Over With» leikar seg med gospel, eit par låtar kan minne om Beach Boys’ surfrock, «Mrs. Bluebeard» – som er basert på eit fransk folkeeventyr om konemord – vert drive fram eit revyaktig pianoakkompagnement, medan tittelsporet «I Like Fun» formidlar ei vag soge om apotekkøar og parkour over ein minimalistisk messing- og skarptrommemarsj og ei mellotronsampling av den silkemjuke stemma til Jack Bruce, bassisten i Cream.

Kommenterande

Absurde verseliner som ein kan lese mangt inn i, står i høgsetet her, til dømes denne frå tidsreisesporet «Push Back The Hands»: «You would give up your right arm to go back. To when you had a right arm.» Stundom skapar sidestillinga av lyrikk og musikk ein påtakeleg ambivalens. Ved sida av tittelsporet, der John Flansburgh proklamerer at han likar moro på dunkelt vis, er til dømes avslutningssporet «Last Wave» ein gladsong om å leve og døy redd og einsam. På forunderleg vis læt tekstane både som eit resultat av og ein kommentar til tida vi lever i, på det politiske og personlege planet likeins.

Rasmus Hungnes

Rasmus Hungnes er musikar og fast platemeldar i Dag og Tid.