Det Norske Mikroteateret

David Ives:

Venus i pels

Regi: Peder Hamdahl Næss

Det Norske Mikroteateret har i ei årrekkje presentert moderne dramatikk i såkalla ekte omgivnader, så som eit husvære, eit hotellrom og liknande. No spelar dei eit stykke som går føre seg på eit teater. Spelestaden er ei scene, altså mindre eksotisk enn elles. Stykket Venus i pels handlar om ein audition og eit møte mellom skodespelar og regissør. Det er prislønt og spela over heile den vestlege verda. Roman Polanski har jamvel laga ein film basert på det.

På gode gamle Chat Noir blir vi følgde inn gjennom tronge bakgangar og opp på scena, der vi får teatersalen som bakgrunnsbilete. Vi ser ein livstrøytt instruktør og ein desperat kvinneleg skodespelar. Ho kjem for seint, men sjølvsagt får ho prøve seg. I brokkar av spelet i spelet, med rolla ho skal prøve i, og i samtaler mellom dei to, utviklar det seg ein dobbeltkommunikasjon. Båe har skjulte agendaer, og makttilhøvet mellom dei vippar fram og attende. Kjærleikskampen mellom mann og kvinne vert leika fram i finurlege, morosame dialogar, som skodespelarane Vanessa Borgli og Øyvind Frøyland går laus på med intelligent ironi.

Regissør Peder Hamdahl Næss har jobba mykje med film og TV, og både replikkar og arrangement har noko tilforlateleg ekte over seg som godt toler nærbilete. Og den patinerte teateratmosfæren sit jo her elles trygt i veggane.

Bent Kvalvik