Det Vestnorske Teateret, scene 2

Kamilla Wargo:

Kvinne kjenn din kropp

Regi: Kamilla Wargo og
Thomas Bye
Scenografi og kostymedesign: Helle Damgård

Når den såkalla feministbibelen Kvinne, kjenn din kropp no har funne vegen til scenen att, kan det vere greitt å vite at dette er i ein annan versjon enn den som vekte både sinne, jubel og latter i det store feminismetiåret. Men Kamilla Wargos sceneutgåve frå 2010 er ikkje mindre underhaldande. Det Reidun Melvær Berge og Kasper Skovli Botnen presenterer på den intime scene 2, er absolutt verdt å få med seg. Også for menn, som ikkje trengt ottast for noko dei ikkje toler sjå.

I 1975 kom den danske handboka og praktiske helseguiden Kvinde, kend din krop, året etter låg ho føre på norsk (Pax Forlag). Fram til 2001 kom boka kvart tiår i nye utgåver. I 2004 kom ei oppdatert og utvida utgåve på same forlag. Som raudstrømpekampskrift i kvinneleg sjølvoppdaging og sjølvrespekt var boka revolusjonær. Samla skal bøkene vere selde i over 300.000 eksemplar i Skandinavia. Det er desse utgåvene som ligg til grunn for Kamilla Wargos sorgmuntre framsyning om kvinneleg identitet, der ho rett nok stiller seg nokså fritt til opphavet.

«Oppsetjinga verkar ikkje utdatert på noko vis.»

Inga tradisjonell soge

All den tid bøkene tek for seg dei fleste sider ved det kvinnelege, så å seie frå fødsel til død, seier det seg sjølv at denne framsyninga ikkje kan bli ei tradisjonell forteljing. Dessutan har mykje skjedd på femti år, dagens kvinner veit langt meir om sex og helse enn formødrene deira, og dei har kort veg til faglege kjelder om det er noko dei lurer på.

Difor kan ei framsyning som denne leggje meir vekt på humor og underhaldning enn folkeopplysning i tradisjonell meining. Publikumsreaksjonen tyder òg på det er ei rett prioritering. I dag er det heller ingen som lèt seg sjokkere av at to skodespelarar, som her, kler seg heilt nakne på scenen. Tvert om, dette er jo eit stykke om kropp. Ein ser det berre som ei hyllest av den naturlege kroppen. Oppsetjinga er sjølvsagt sterkt modernisert og verkar difor ikkje utdatert på noko vis.

Skråblikk

Kamilla Wargo har laga ein serie små sketsjar, som med eit humoristisk skråblikk går inn på svært mange sider av kvinnelivet og såleis spring frå tema til tema. Det politiske perspektivet finst framleis, men er blitt langt mindre framtredande. Halvannan time er nok til å ta publikum gjennom evig aktuelle tema som menstruasjon, graviditet, fødsel og valdtekt og nyare fenomen som hormonbehandling, plastisk kirurgi og kvinner som slår – og alt imellom. Då ikkje minst seksualiteten og orgasmens fire fasar.  

Reidun Melvær Berge og Kasper Skovli Botnen (som hadde same rolla på Teater Ibsen for nokre år sidan) går til oppgåvene med stort overskot. Dei står godt til kvarandre og går kjapt og utan nøling frå scene til scene, også det fysiske beherskar dei godt. Det er blitt ei framsyning med fart og humør.

Jan H. Landro

Jan H. Landro er forfattar, journalist og fast teatermeldar i Dag og Tid.