Komedie

Regi: Kay Cannon

Blockers

Med: Leslie Mann, Ike Barinholtz, John Cena

Nok ein farse om tenåringar som skal ha sex for første gong, seier du? Kan det bli morosamt? Og viss så: Har filmen noko vektig å seie om temaet? Svaret er at Blockers faktisk lukkast i å vere ein morosam tenåringskomedie som jamvel har friske perspektiv på ein utmatta sjanger.

Sexpakt

Vi skal til ein suburb i Illinois. Tre venninner – Julie, Kayla og Sam – førebur seg til den store High school-avslutninga: skuleballet. Julie, den einaste av jentene som er i eit forhold, har bestemt seg for å miste jomfrudommen denne kvelden. Kayla vil ikkje vere dårlegare og plukkar spontant ut ein gut i kantina. Introverte Sam går motviljug med på «sexpakta».

Foreldrepanikk

Når denne premissen er etablert, tar heldigvis filmen ein kreativ U-sving. Foreldra oppdagar planane og får panikk.

Resten av tida følgjer vi tre av foreldra i den desperate jakta på å hindre barna i å ha sex. Denne jakta inneber «vaksne» som trenger seg inn på ungdomsterritoriet, blir med på teite drikkeleikar og generelt står fram som dei minst fornuftige. Det er mykje å le av her, både i form av fysisk humor og vittige replikkar. Men framfor alt er det forfriskande å sjå ein tenåringskomedie som grip temaet sex-for-første-gong med etisk tyngde og refleksjon.

Sondre Åkervik

Sondre Åkervik er student, skribent og fast filmmeldar i Dag og Tid.