Action

Regi: Stefano Sollima

Sicario 2: Soldado

Med: Benicio Del Toro, Josh Brolin, Isabela Moner

Cowboy-agenten Matt (Brolin) og den hemnlystne, lyssky oppdragsmannen Alejandro (Del Toro) skal nok ein gong gje seg inn i dei mørkaste krokane av amerikansk etterretning. I denne står menneskesmugling i sentrum i det som er ein actionpakka oppfølgjar til narkokartellfilmen Sicario (2015).

Enkelt og vanskeleg

Medan den fyrste filmen var regissert av Denis Villeneuve, har den nye regissøren, Stefano Sollima, strippa ned mykje av dei etiske problemstillingane med det å vera etterforskar og heller laga ein relativt streit actionfilm. Sollima og Villeneuve har nok begge vore kloke val, om enn på to ulike vis. Det må seiast at den fyrste filmen var ein langt meir raffinert sak der ein verkeleg måtte ta inn over seg djevelskapen og kva ein gjer i kampen mot noko så tilsynelatande uoverstigeleg som narkotikahandelen og alt den fører med seg. Såleis burde ein oppfølgjar om menneskesmugling vore endå meir brutal, men her har då altså Sollima (kjend for serien Gomorrah (2014) og Suburra (2015)) valt å leggja seg på ei linje der bortføring av dottera til kartellkongen Carlos Reyes blir drivkrafta.

Einsemd på spansk

Kva er verdien av eit liv? Begge filmane kan få ein til å gråta over verdas urett og kva for nokre vondskapsfulle dyr me menneske er. Sicario 2: Soldado stikk likevel ikkje så djupt, noko eg personleg er glad for, då eg framleis har arr etter å ha sett fyrstefilmen. Narrativet er enklare, tempoet høgare, musikken akkurat lik, summen er ei noko meir overflatisk framstilling av ei menneskeskapt krise verre enn din villaste fantasi. Hadde eg berre kunna roa meg med at det berre er på film.

Brit Aksnes

Brit Aksnes er frilans kulturarbeidar
og fast filmmeldar i Dag og Tid.