Per Idar Almås (37) innser fullt og heilt at å ta over etter Hilde Bjørkum, blir som å hoppa etter Wirkola. Det er såleis med skrekkblanda fryd han går til oppgåva, men i sjefsstolen set han seg ikkje før 1. oktober. Først har han ein jobb å gjera som prosjektansvarleg for Festspela i Bergen og som sjef for kammermusikkfestivalen Gloppen Musikkfest.

– Kva fekk deg til å søkja toppjobben på Førdefestivalen?

– Det er ein spennande festival med særpreg, ein av dei mest interessante kulturjobbane ein kan ha. Og eg vil helst arbeida med festivalar. For meg som bur på Sandane, er det dessutan greitt å kunna sleppa å pendla.

Festivalar har Per Idar Almås ei viss røynsle med, og han håper å kunna dra nytte av det han har erfart både i Festspela, Gloppen Musikkfest og som del av staben for Tall Ships Race i Bergen. Opphavleg kjem han frå Stord. Han utdanna seg som film- og TV-redigerar, og han tok seinare ein bachelor i kulturformidling. Almås har mellom mykje anna vore produksjonsassistent på innspelinga av fleire Varg Veum-filmar, grafikkreporter i TV 2 og jobba med kultur i Bergen kommune.

– Desse jobbane har gitt meg eit sterkt engasjement for kulturformidling for barn og unge. Ein prioritet vil bli å leggja til rette for at denne gruppa skal få høve til å oppleva kunst og kultur.

Almås veit inderleg vel at han skal erstatta henne som har hovudansvaret for å ha utvikla den suksesshistoria Førdefestivalen er blitt, Hilde Bjørkum, som har vore der frå dag ein.

– Det er store sko å fylla. Eg prøver å ikkje tenkja for mykje på at eg skal gjera ting på same måten som ho. Eg vil ta med meg det som er blitt gjort, men eg må vera meg sjølv og gjera ting ut frå mine tankar. Men eg veit jo at det er lett å bli målt opp mot det som har vore gjort.

– Kva slags forhold har du til verdsmusikk?

– Eg har høyrt ein del på det, men skal ikkje skryta på meg ein grundig kompetanse, noko eg sjølvsagt ynskjer å gjera noko med. Generelt er eg open og begeistra for svært mykje. Eg har gått mykje på konsertar i ulike sjangrar, musikalsk er eg nokså altetande. No ser eg fram til å setja meg inn i verdsmusikken. Eg er glad for at Hilde Bjørkum skal halda fram ei stund som rådgivar. Dessutan har festivalen ein svært kompetent stab som eg gler meg til å arbeida med.

– Blir det stø kurs vidare, eller ønskjer du å gjera endringar i festivalprofilen?

– I sjølve profilen veit eg ikkje om det blir så store endringar. Men eg vil tru og håpa at folk kan sjå at det er komme inn ein ny person. Eg har litt tankar og idear, eg veit kva eg sjølv likar og kva eg ønskjer å jobba med. Men noka programerklæring vil eg ikkje ut med no.

– I Gloppen Musikkfest har du vore meir administrator enn programmerar. I Førde blir det annleis?

– Rett nok har kammermusikkfestivalen to kunstnarlege leiarar, meg eg sit i programrådet. Så ser eg at det blir annleis i Førde, der eg skal ha det kunstnarlege ansvaret. Det er jo ein svært populær festival, som artistane ønskjer å spela på.

– Kor mykje av 2019-festivalen vil ha ditt stempel?

– Det er vanskeleg å seia. Eg håper eg kan peika ut ein kurs, men har ingen planar om å snu om på alt. Eg vil gjerne ha inn nokre prosjekt som eg brenn for.

– Til dømes?

– Eg er glad i sjangeroverskridande musikk, folk som tek tradisjonell musikk med seg over i andre sjangrar. Samtidig skal den reine folkemusikken vera med vidare, og så er det viktig å finna dei gode møta. Eg håper vi kan vidareføra det.

Jan H. Landro