Kultur

Ottar Fyllingsnes

ottar@dagogtid.no

Den svenske forfattaren Jonas Jonasson har all grunn til å smila. Han gav ut suksessromanen om hundreåringen i Sverige i 2009, og sidan har boka kome ut i 45 land. I tillegg har han skrive Analfabeten som kunde räkna og Mördar-Anders och hans vänner, og dei to er selde i til saman fem millionar eksemplar, fortel Hufvudstadsbladet.

I slutten av august kjem Jonas Jonasson med framhaldet av historia om den hundre år gamle Allan Karlsson, og romanen har fått tittelen Hundraettåringen som tänkte att han tänkte for mycket.

– Førehandsinteressa for bok nummer fire tyder på minst fire millionar eksemplar til. Nesten fem millionar eksemplar i snitt per bok er det ikkje så mange i Sverige som klarar, seier Jonasson til den finlandssvenske avisa.

I Tyskland reknar han med å kunna selja ein million hundre-
ogeittåringar, men han er også populær i den engelskspråklege verda og i andre store land som Sør-Korea, Frankrike, Spania og Italia.

I den nye romanen sit Allan Karlsson på Bali og tel ned til sin hundreogførste fødselsdag. Han har det like keisamt som den gongen han klatra ut gjennom vindauget på gamleheimen og forsvann. Men venen Julius bestemmer seg for å gje Allan ein luftballongtur over øya på fødselsdagen. Venen tek med nokre flasker champagne, og Allan doblar, i tilfelle det skulle verta vindstille der oppe. Men vinden blæs feil, og dei krasjlandar i Indiahavet, der dei vert berga av eit nordkoreansk lasteskip. I boka får lesarane vera med på ei reise gjennom verdas galskap, og undervegs stikk gamlingen kjeppar i hjula for både Kim Jong-un, Donald Trump, Vladimir Putin, Angela Merkel og ein svensk utanriksminister.