Ida Lødemel Tvedt

Ida Lødemel Tvedt skriv essay og reisereportasjar om samfunnstendensar, kultur og idear. Ho er frå Bergen, men bur i Oslo og er tilsett i fast halv stilling i Dag og Tid.

Lødemel Tvedt debuterte med essayboka Marianegropen i 2019. Boka blei løfta fram som ei av årets beste i mange norske aviser, og ho har fått eit rikt etterliv i Nederland, Belgia, Danmark, Tyskland og Sveits, med arrangement vigd boka på scener som Litteraturhuset i Zürich og forsideoppslag i Das Magazin.

Ho har to mastergrader, ei frå The New School for Social Research og ei frå Columbia University. Tidlegare har ho òg studert ved Sorbonne VI, Universitetet i Bergen og UC Berkeley.

Lødemel Tvedt er gjesteforelesar i essayistikk ved fleire norske skriveutdanningar (Skrivekunstakademiet, forfattarstudiet ved UiT Noregs arktiske universitet, Nansenskolen, Tekstuniverset med fleire) og i diverse avisredaksjonar. I USA har ho undervist ved Columbia University og Eugene Lang College på Manhattan.

Tekstane hennar har stått på trykk i N+1, Guernica, Das Magazin, Vagant, Side Magazine og fleire andre stader i inn- og utland. I 2021 fekk Lødemel Tvedt Hestenes-prisen for framifrå kulturjournalistikk.