Kommentar
Ta oss på alvor, ikkje på rumpa
Kvinner i byggebransjen er mangelvare. Vi kan ynske oss fleire, men bør byrje med å ta vare på dei vi har.
I byggperioden til Det nye nasjonalmuseet har kvinnelege lærlingar måtta leve med at doveggar og heisar har vorte nedskribla med sjikane.
Foto: Carina Johansen / NTB
For ein liten månad sidan byrja fleire jenter enn nokon gong tidlegare på vidaregåande utdanningar som munnar ut i mannsdominerte yrke. Aldri før har så mange jenter og kvinner gått på byggfag, elektrofag og industri- og prosessfag.
Likevel er dei ein forsvinnande liten del av elevtalet. Det er også i kvardagen dei vil måtte leve med ute i arbeidslivet: På norske byggeplassar er berre 8 prosent av arbeidstakarane kvinner, og berre 2 prosent har fagbrev. Dei få som er der, og ikkje minst dei nye som byrjar no, bør vi ta særs godt vare på – og vi har ein jobb å gjere for å få det til.
Gløymde metoo
Framtida treng fagarbeidarar. Om vi held fram som vi gjer no, med til dømes å rekruttere dei frå berre halvparten av folket, kan vi kome til å mangle 100.000 fagarbeidarar i 2035.
Men det er ikkje berre fordi dei er sårt naudsynte, vi skal ta godt vare på dei: «Alle» er samde i at fleire kvinner i byggebransjen er ein god ting. Mangfald er bra for arbeidsmiljøet, og kvinner bør ha same rett som menn til å velje yrke etter interesse og ikkje etter kjønn. I alle fall er det tilsynelatande slik. Røynda er ei anna.
Metoo nådde aldri skikkeleg fram i byggebransjen. Mellom anna difor kjenner vi ikkje omfanget av seksuell trakassering på norske byggeplassar. Til Bygg.no fortalde lærlingen «Ida» i sommar om seksuell trakassering på fleire byggeplassar der ho har jobba som lærling. Trakasseringa vart handtert ved å omplassere henne. Vi veit at det nye Nasjonalmuseet har vore ein byggeplass der alt frå doveggar til finerplater og heisar har vore nedskribla med sjikane.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
