Jon Hustad

jon@dagogtid.no

Då TV 2 vart oppretta, var gleda stor på høgresida: Noreg skulle få ein ålmennkringkastar utanfor den klamme famna til staten. Det einaste eigarane måtte gjera for å få tilgang til kringkastingsnettet til NRK, var å ha eit hovudkontor i Bergen og senda nyhende og litt lødig kultur. Det har TV 2 gjort i 27 år no, stort sett med stort overskot. Ja, så stort har overskotet vore at dei to øvste direktørane av danske Egmont, som eig TV 2, i 2016 fekk 43 millionar i løn og bonusar. Men denne veka vart det klart at TV 2 dei neste fem åra for fyrste gong skal få om lag 700 millionar i statsstøtte mot at dei har hovudredaksjonen minst 100 kilometer frå Oslo, som i praksis tyder Bergen. Jostein Gripsrud er medieprofessor nett i Bergen og var i si tid leiar for ålmennkringskastingsrådet.

– Kvifor skjer dette?

– Av di TV 2 har lyst på pengane. Det er i og for seg greitt, vi har alle lyst på pengar. Men med statsstøtte plar det koma vilkår, og det gjer det i dette tilfellet òg. I praksis tyder avtalen at TV 2 skal halda fram med å vera i Bergen, og det er på ingen måte uviktig. TV 2 vart oppretta av di Stortinget ville ha ein profesjonell fjernsynsredaksjon utanfor ammeskodda i Oslo. Det treng vi meir enn nokon gong.

– Men det var òg krav til innhald?

– Ja, TV 2 skulle vera ein ålmennkringskastar, ein såkalla public service-kanal. Dimed fekk dei høve til å senda på det vanlege nettet utan å gå om kabel. I det låg det òg at dei skulle ha nyhendeprogram og ein programprofil det var knytt kulturelle vilkår til. Men det kan eg seia etter å ha vore med i ålmennkringkastingsrådet, at slikt er det ikkje lett å handheva. Men no har vi altså òg fått ein avtale om statsstøtte, at dei skal få skattepengar mot å gjera dette og hint.

– Men treng dei statsstøtte når sjefane får 43 millionar kroner i året? Det er ikkje noko ein forventar frå tre i utgangspunktet liberalistiske parti?

– For meg er det ikkje uventa at denne regjeringa gjev statsstøtte. I nær alle parti tenkjer ein i Noreg distriktspolitisk, det er ein ibuande motstand mot at alt skal vera i Oslo. Det er eit gamalt prinsipp som eg er samd i, eit anna perspektiv på nyhende er etter mitt syn meir viktig enn nokon gong. Men når det gjeld leiarløningar – og lat meg få understreka at ingen er verd det som Egmont-leiinga får – må eg konstatera at ein berre kan gjeva opp å regulera slike.

– Statsstøtta er eit norsk kulturpolitisk tiltak. Er verkeleg eit Egmont-ått TV 2 eit norsk selskap?

– Nei, det er ikkje innlysande. Og ein kan tenkja seg at Egmont vil henta ut stordriftsfordelar ved å leggja produksjon til Danmark. Det berre går eg ut frå er bygd inn i avtalen at ikkje skal henda. Statstøtta er òg eit næringspolitisk signal, pengane må gå til å byggja norsk fjernsynsproduksjon i Bergen. Men Egmont er trass alt ikkje eit amerikansk medieselskap. Dei har vore til stades i Noreg i over hundre år.

– Mellom veteranane i TV 2 har det vore stor motstand mot statsstøtte. Oddvar Stenstrøm meiner at dette vil leggja føringar på produksjonen, at statsstøtte gjer ein avhengig av staten. Det er det vel noko i?

– Ja, statsstøtta inneber plikter. Og ja, det legg band på kor kommersiell TV 2 kan vera; det følgjer grenser med statsstøtte. Men slik må det vera. Om staten ikkje hadde stilt krav, ville pengane ha vore ei rein gåve.

– Og no kjem TV 2 til å oppføra seg som staten vil?

– Det er langt frå sikkert. Eg skal ikkje nemna namn her. Men då Schibsted fekk taka over regionavisene og slå dei saman til eitt konsern, var det eit krav at hovudkontoret måtte liggja i Bergen. Ein kjenning av meg var etter ei tid innom kontoret som låg ved sida av TV 2. Det var på 200 kvadratmeter og heilt i enden sat det ein einsleg mann. Det ligg ikkje noko magisk i det å ha hovudkontor i Bergen. Skal TV 2 halda fram med det, må dei møta konkrete krav.