Sør-Amerika
No satsar Bolivia på «kapitalisme for alle»
Etter 20 år med sosialisme blir ein moderat politikar frå høgresida president i Bolivia. No står Rodrigo Paz overfor ei svært vanskeleg oppgåve.
Rodrigo Paz vann presidentvalet i Bolivia,
og mykje arbeid ventar. Her feirar han dei førebelse resultata under valdagen.
Foto: Claudia Morales / Reuters / NTB
Då sigeren var eit faktum, kom Rodrigo Paz
ut på scena, slik politikarar bruker å gjere etter eit val. Han takka
hjelparane sine, gjentok slagordet frå valkampen og lova landsmennene sine ei
betre framtid. Men den nye presidenten i Bolivia verka alvorstyngd då han
gjorde dette. Truleg fordi han veit at denne oppgåva blir forbaska vanskeleg.
Den 58 år gamle kristelegdemokraten Rodrigo
Paz overraska alle då han vann presidentvalet i det søramerikanske landet med
12 millionar innbyggjarar. I den første valomgangen i august kapra han
førsteplassen, sjølv om gallupinstitutta berre hadde spådd tredjeplass. Og i
den andre valomgangen sist sundag slo han den høgreliberale Jorge Quiroga, som hadde
leia på meiningsmålingane. I november flyttar Paz inn i presidentpalasset i La
Paz, noko som markerer eit politisk vendepunkt: Etter to tiår får Bolivia på
nytt ein president som ikkje er sosialist.
Ein oppslutnad på berre
3 prosent for partiet til Evo Morales
Sidan 2006 hadde sosialistpartiet Movimiento
al Socialismo (MAS) styrt landet i Andesfjella, størstedelen av tida under Evo
Morales, ein tidlegare kokabonde og fagforeiningsleiar. Men i den første omgangen
av president- og parlamentsvalet i august fall oppslutnaden til MAS dramatisk,
heilt ned til berre 3 prosent.
Valsigeren til Morales for to tiår sidan
var ein milepåle for bolivianarane, og kan samanliknast med Barack Obamas siger
i det amerikanske presidentvalet.
Store delar av det bolivianske folket har
urfolksbakgrunn, og for første gong blei ein av deira eigne vald til
statsleiar.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
