Krig
Ukraina ventar på Godot
I ein situasjon som handlar om å overleve, har ikkje kultur førsteprioritet.
Det fyrste toget frå Kyiv, måla i patriotiske fargar og motiv, rullar inn på den atterobra jarnbanestasjonen i Kherson 19. november.
Foto: Murad Sezer / Reuters / NTB
Kva har Adam og Eva, Newton og Steve Jobs til felles? Den første tanken min var, om ein sluttar seg til den bibelske historia, at Newton og Steve Jobs begge er etterkommarar etter Adam og Eva. Men det er eit betre svar – eplet har spela ei svært viktig rolle for dei alle.
I Transkarpatia står denne tanken sentralt i samband med ein skulptur som nett er laga av Roman Murnik. Verket hans er plassert i ein park ikkje langt frå Uzjhorod, epletre er planta kring det, og lokale styresmakter vonar at dette «epletorget» vil bli ein populær turistattraksjon.
Sist onsdag, då russiske bombefly nok ein gong avfyrte rundt 70 missil mot Ukraina, noko som tok livet av ti personar i Kiev og Kiev-regionen og også gjorde skade i andre område, nådde ikkje eit einaste missil Transkarpatia. Ja, etter angrepa forsvann straumen – og med det varmen – i byar over hele landet, til og med i nabolandet Moldova, og folk måtte gå til sengs med jakke på seg. Men Transkarpatia vart spart.
Transkarpatia er framleis meir eller mindre fredeleg. Russiske missil eksploderer ikkje her, takk vere venskapen mellom den ungarske statsministeren Orban og Vladimir Putin, ein venskap som verkar styrke seg. Ungarn blokkerer finansiell hjelp frå EU til Ukraina. Landet ønsker òg å lette på økonomiske sanksjonar som EU har lagt på Russland. Og så, for berre nokre dagar sidan, kunngjorde Ungarn at landet gjerne vil utvikle økonomisk samarbeid med Iran.
Takk vere avtalane mellom Putin og Orban har Nord-Korea–Iran–Russland-«sabelen» strekt seg heile vegen til Europa. For å bli enda meir lik Putin kom Orban nyleg til ein fotballkamp med eit skjerf der det var eit kart over «Stor-Ungarn», som omfatta territoria til Austerrike, Ukraina og Serbia.
For Ukraina er den einaste fordelen med desse avtalane mellom Putin og Orban den relative roa i Transkarpatia, ein region med grense til Ungarn og Slovakia.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
