Tysdag denne veka sende Amazon ut ei pressemelding om at selskapet er i ferd med å etablere seg i Sverige. Men rykta har gått lenge: Alt i april i år melde Eskilstuna-Kuriren at eit lager truleg er under bygging i Eskilstuna.

Både svenskar og nordmenn har handla i mange år via Amazon-nettstader i USA eller andre land, Amazon Prime Video har vore tilgjengeleg ei god stund, og selskapet etablerte seg med skylagring i Noreg i fjor, men Sverige blir det første nordiske landet med ei eiga Amazon-avdeling og nettside. No spekulerer mange på når det kjem ei etablering også i Noreg. I ei stillingsutlysing søkjer selskapet etter ein svensktalande marknadssjef som skal ha ansvar for heile Norden.

Om eller når Amazon-etableringa skjer i Noreg, får det store følgjer for norsk varehandel, sa professor Peder Inge Furseth til Dagens Næringsliv denne veka. «Amazon står for et enormt utvalg, rask levering og lave priser. På grunn av korona har nordmenn også blitt mer positive til å handle på nett, og pandemien har nok ført til en akselerasjon av den dreiningen i handelsvaner», meinte Furseth.

For nordmenn som forbrukarar kan innmarsjen ha hyggelege konsekvensar: Det er grunn til å tru at det vil gje press på prisane på mange typar varer. For dei som alt driv med netthandel her i landet, blir truleg Amazon ein formidabel utfordrar. Kva følgjene blir for dei utsette fysiske butikkane rundt i landet, eller for dei som arbeider i ein transportbransje der lønene alt er drivne svært langt ned, står att å sjå.