Replikk

Morten A. Strøksnes

Slik ein måtte forvente, rykte NHO og Civita ut etter intervjuet mitt med Linn Herning, som er leiar i For Velferdsstaten («Ut og mate bendelorm», 15. september). I Civita fell jobben på professor Jan Erik Grinheim, han har ei deltidsstilling der.

Det store ankepunktet hans er at det i intervjuet blir slumsa med omgrepa privatisering og konkurranseutsetjing. Dette er rein skolastikk. Dei to omgrepa tyder ikkje nøyaktig det same, men dei blir brukte om kvarandre i daglegspråket. Når offentlege velferdstenester blir konkurranseutsette, blir dei, i ei vanleg meining av ordet, privatiserte. Men sjølvsagt ønsker Høgre, NHO og Civita/Grindheim at fellesskapet fortsatt skal betale gildet. Det er jo heile forretnings­ideen. Velferdskonserna skal hente profitt ut av fellesskapens midlar.

Grindheim freistar å gje inntrykk av at det er forskinga hans som får han til å reagere. Grindheim går sjølvsagt ikkje inn slik han gjer, med reinspikka polemikk, fordi Herning eller eg sa noko som strir mot vitskapen. Han gjer det fordi han er, slik eg ser det, lobbyist på vegner av velferdskonserna, som vil ha tilgang til ei statleg honningkrukke, sidan dette gjer høgare og meir føreseieleg profitt enn så mykje anna. Privatisering av offentlege tenester og konkurranseutsetjing av velferd har vore eit klondyke for velferdskonsern, ofte med adresse i skatteparadis.

Grindheim får høg professorløn frå det offentlege, frå fellesskapen, frå oss. At han likevel driv polemikk og lobbyverksemd på vegner av velferdsprofitørar, er ikkje berre flautt. Slik undergrev i tillegg akademiske institusjonar sin tillit og autoritet.

Vi ser at dette skjer på felt der det er store pengar involvert. Lakselobbyen, energilobbyen og velferdslobbyen kjøper seg akademikarar for å fremje sin agenda. Etter mitt syn burde universitet og høgskular slå ned på denne misbruken av titlar frå trojanske hestar i akademia. Alle skjønar at ein ikkje både kan vere objektiv vitskapsmann og leige seg ut til sterke økonomiske særinteresser på denne måten. Grindheim og folk i hans sko må velje: Dei bør vere enten akademikarar eller lobbyistar, og ikkje veksle mellom rollene. Folk med integritet skjøner dette enkle poenget heilt av seg sjølv.

Morten A. Strøksnes er journalist i Dag og Tid.