Israel
Orwellsk nytale: Angrep blir forsvar
I Dag og Tid nr. 26 har Henrik Wigestrand eit svar på mitt innlegg «Balansert debatt om antisemittisme?» Men svaret handlar ikkje om dette; han påstår at det er «grovt upresist» å snakke om Israels angrepskrig i 1967. Og okkupasjonen av heile Palestina og delar av nabolanda Syria og Egypt som blei resultatet, er i hans språk «etablering av en buffersone».
Sjølv følgde eg konflikten i 1967 frå time til time, og eg opplevde at norske aviser i sine første utgåver i 1967 kom med den falske versjonen om at Israel var angripe, før dei utover dagen måtte endre oppslaga (utan å heilhjarta støtte Israel).
I Store norske leksikon (2024) står dette om seksdagarskrigen i 1967: «Mens Oktoberkrigen (1973) ble startet av de to arabiske statene, ble seksdagerskrigen startet av Israel. Seksdagerskrigen var i realiteten tre kriger: Israel angrep først Egypt 5. juni. Samme dag ble Israel angrepet av Jordan, mens Israel gikk inn i Syria 9. juni. Allerede 5. juni angrep Israel alle tre lands flybaser.»
Wikipedia har dette saksforløpet: «Den 5. juni 1967 gikk Israel til angrep på Egypts luftvåpen. Jordan, som hadde signert en gjensidig forsvarsavtale med Egypt den 30. mai 1967, gikk så til angrep på Jerusalem og Netanya. Israels lynraske angrep fikk stor betydning ikke bare for krigsutfallet, men også fordi den bidro sterkt til den respekt som etter hvert vokste frem for det israelske forsvaret og ikke minst for Israels generelle besluttsomhet i konflikter. Hele Sinaihalvøya, Golanhøyden, Gaza og Vestbredden ble okkupert av den israelske hæren.»
Seksdagarskrigen er utan tvil ein viktig del av bakgrunnen for det tragiske som no skjer. Dei som alltid støttar Israel, forsvarer Israels angrep i 1967 med at det var ein preventiv krig, eller det som seinare er blitt kalla «forkjøpskrig». Wigestrand går eit steg vidare og kallar angrep forsvar. Men argumentasjonen er den same som for preventiv krig. Knapt nokon angrepskrig i historia er sett i gang utan at angrepet er blitt grunngitt på denne måten.
Den språklege nytalen der angrep blir forsvar, er lett å kjenne igjen frå Netanyahus nylege angrep på Iran og store EU-lands mantra om at Israel har rett til å forsvare seg – når landet går til eit blodig bombeangrep. Da hadde Netanyahu i 30 år påstått at det var rett, før Iran fikk atomvåpen – og da ville utslette Israel.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.