Jazz

Helge Lien Trio:

Guzuguzu

Helge Lien, piano, Frode Berg, bass og Per Oddvar Johansen, trommer. OZELLA OZ070CD

Helge Lien har vore på jakt i det japanske språket og funne onomatopoetikon – lydord – som han har brukt som titlar på åtte av dei ni låtane på den nye plata. Dei byrjar med torevêr («Gorogoro») og avsluttar med stille regn («Shitoshito»).

Som så ofte når Helge Lien gjev ut plater, har han komponert det meste av materialet sjølv. Det gjeld utan unnatak her. Komposisjonane held alltid høgt nivå, og her tykkjer eg det er spesielt vellukka fordi han gjennom låtmaterialet får fram alle dei sterke sidene ved trioen. Dette er svært godt illustrert i låten «Garari» («fullstendig»). Låten byrjar med ein kort trommeintro, Lien kjem inn og utvidar klangpaletten med å grafsa oppi flygelet før han spelar eit kort tema med venstrehanda unisont med Berg. Berg tek det vidare med nydeleg strykebass, og det heile munnar ut i eit langt kor av Lien oppå eit ostinat av Berg med intenst svingande trommespel av Johansen. Dei vender attende til temaet, og Berg avsluttar om mogeleg endå vakrare med bogen. Dette er eitt av fleire høgdepunkt på plata.

Eit anna høgdepunkt er tolkinga av «Jasmin», den einaste låten som blei spelt inn i ein studiosession for seg. Temaet er vakkert og tydeleg inspirert av norsk folkemusikk. Lien improviserer rundt ein låg borduntone i klaveret à la Keith Jarrett.

Assosiasjonar til Jarrett får ein også med den sprelske og skiftande låten «Kurukuru» («snurrar rundt») i tillegg til eit flott basskor. Heilt nedpå tek dei det med «Shitoshito». Her får Lien boltra seg i balladetempo til eit vispekomp som berre Per Oddvar Johansen kan. Nok eit blinkskot frå ein trio som sannsynlegvis ikkje kan laga dårlege plater.

Lars Mossefinn

Lars Mossefinn er frilans kulturarbeidar og fast jazzmeldar i Dag og Tid.