JAZZ

Torhild Ostad / Carsten Dahl:

Jeg roper til deg

Torhild Ostad, vokal og Carsten Dahl, piano og
modifisert piano.
NORCD NORCD1781

For 21 år sidan gav Torhild Ostad ut Blomar i moll. Sidan har det vore stilt frå den kanten. Detaljar i den musikalske biografien er sparsame, men som plateartist har ho i alle fall skunda seg svært langsamt. Høvet til å jobba med den danske pianisten Carsten Dahl baud seg, og det kunne ikkje Ostad seia nei til.

Musikken blei spelt inn i mars i fjor i Rainbow Studios med Jan Erik Kongshaug ved spakane. Ryktet har gått framføre plata, og rykta sa at samarbeidet mellom Ostad og Dahl bygde på særs god kjemi. Musikalske tvillingsjeler, seier plateselskapet. Etter å ha høyrt på produktet nokre gonger, er eg freista til å gje dei rett, men ærast alle som bør ærast – dei har hatt særs god hjelp av nemnde studio og lydteknikar.

Plata byr på 13 låtar der seks er originalbidrag frå duoen, medan resten er tradisjonsmusikk frå ymse kantar av landet med eit tyngdepunkt på Sunnmøre, eit område Ostad kjenner godt frå oppveksten.

Mykje av tradisjonsstoffet er kjent, men Ostads personlege tolkingar og ikkje minst Dahls originale akkompagnement gjer dette til nye og til tider overraskande lytteopplevingar. Dette gjeld særleg dei låtane der Dahl nyttar såkalla modifisert piano.

Spelet til Dahl gjer Nils Olsen Svees «O Jesu, dagens klare sol» truverdig. Ostad og Dahl har funne kvarandre musikalsk, men Ostad er på sitt mest djuptloddande i den akkompagnerte «Tenk, når ein gong». Der kan ein høyra den mykje omtalte patinaen, og ein skjønar at det er ikkje alt ved det å bli eldre som er negativt.

Lars Mossefinn

Lars Mossefinn er frilans kulturarbeidar og fast jazzmeldar i Dag og Tid.