Jazz

Friensemblet:

Out of Silence

Giraffa
Records GIR1706

Den femte plata til Friensemblet er spesiell fordi ho i så sterk grad fokuserer på gjestemusikaren og komponisten i bandet, franske Nalssam Jalal. Primus motor i Friensemblet, Mathilde Grooss Viddal, høyrde Jalal i NRKs Jungeltelegrafen. Kort tid etter møttest dei i Paris, og ein avtale om samarbeid blei gjort. Musikken blei spelt inn dels på den nasjonale jazzscena Victoria, Kampenjazz og Bø jazzklubb i 2015/2016, og no ligg resultatet føre. Det er blitt ein fin miks av arabiskpåverka musikk og musikk ein forventar å få servert frå Friensemblet.

Tre sekvensar

Jalal har syrisk bakgrunn og noko av utdanninga si frå Damaskus og Kairo. Ho kom attende til Frankrike i 2006, og leier i dag den spanande kvintetten Nalssam Jalal & Rhythm of Resistance.

Musikken er delt inn i tre sekvensar som blir innleidde av fire frittståande komposisjonar. Tre er signerte Viddal og éin Jalal. Så følgjer det frie stykket «Animal Farm» i tre deler, og plata blir avslutta med tre Jalal-komposisjonar, rettare sagt er «Frontières» eit dikt Jalal resiterer oppå eit klangteppe skapt av delar av orkesteret.

Kraftfullt

Det er ikkje alltid eg lèt meg begeistra av fløytekor, men Jalals fløytespel har noko både forførerisk og kraftfullt ved seg. Ho inspirerer fleire musikarar til å følgja opp, og Out of Silence må vera det spenstigaste ensemblet har gjort, solistisk sett. Plata er fylt opp av kreative bidrag. Med dette samarbeidet har Viddal teke Friensemblet endå eit kunstnarleg sjumilssteg vidare.

Lars Mossefinn

Lars Mossefinn er frilans kulturarbeidar og fast jazzmeldar i Dag og Tid.