Jazz

Nicolai Majland Trio:

Welcome

Nicolai Majland, piano; Thomas Fonnesbæk, bass; Morten Lund, trommer.
AMP Music & Records

Easy listening kling odiøst i jazzkrinsar, like odiøst som trekkspeljazz og Kenny G, men det er ikkje til å koma forbi at mykje jazz som har eit udiskutabelt kvalitetsstempel, er lett å lika frå byrjinga.

Dette var det enkle resonnementet som melde seg ved første gjennomhøyring av den danske pianisten Nicolai Majlands ferske utgjeving Welcome.

Musikken kan kategoriserast som melodiøs mainstream med Bill Evans og Keith Jarrett som tydelege inspirasjonskjelder. Av aktive nordiske jazztrioar kan dei minna om Espen Eriksen Trio, spesielt når dei er på det mest lyriske og melodiøse, men i raskare tempo, mellom anna i «Off Road Blues», er den amerikanske slektskapen tydelegare.

Majland, som gav ut den førre plata si, Leaving and Believing, i 2015 med popsongar som «Alfie» og «Fool on the Hill», serverer her ti originalkomposisjonar. Det gjer det heile meir interessant. Fleirtalet av låtane er melodiøse, harmonisk enkle og i medium tempo. Trioen har kome skikkeleg på innsida av komposisjonane og har jobba mykje med arrangementa.

Fonnesbæk og Lund er heller ikkje kva som helst slags komp. Dei fyller komprolla med glitrande fargelegging, diskré sving og drivande groove. Dei improviserte partia er sterkt avgrensa, men Fonnesbæk og Lund skin også her – dei få gongene dei får sjansen. Vakkert, men langt frå banebrytande.

Lars Mossefinn

Lars Mossefinn er lærar ved Voss gymnas og fast jazzmeldar i Dag og Tid.