Folkemusikk

Olav Løndal:

Tuddal

Aksent

Hardingfelespelaren Olav Løndal (1904–1986) var ein av dei sentrale forvaltarane av folkemusikken i Telemark. Det var mykje felespel i slekta; både far hans, Svein, og brørne Kjetil og Einar er kjende spelemenn. Og ein annan tuddøl, Knut Buen, lærte òg mykje av løndalsspelet. Buen har stått for utvalet av slåttar og skrive ein fyldig artikkel som fylgjer med plata.

Medan mykje av det som vert utgjeve av arkivopptak, har meir eller mindre profesjonell lydkvalitet (gjerne henta frå det rikhaldige arkivet til NRK), er denne utgjevinga utelukkande sett saman av privatopptak frå 1950-talet, gjorde av Hølje Landsverk, Anders Buen og Hauk Buen.

Teknikar Audun Strype har gjort ein stor jobb med lydrestaurering, men likevel har lydkvaliteten noko upretensiøst og spontant over seg, som er sjarmerande. Nokre av opptaka er henta frå kappleikar, der slåtten og spelemannen vert introduserte, og dette tilfører produksjonen ei ekstra stemning.

Mannen bak plateselskapet Aksent, Håvard Svendsrud, har etter kvart gjeve ut mykje verdfullt arkivmateriale, og denne produksjonen føyer seg inn i rekkja av viktige utgjevingar som alle kjennarar av norsk folkemusikk vil kunna gle seg over.

Produksjonen kan dessutan tena som ein honnør til alle dei som har vore «der det skjedde», og frivillig dokumentert viktige delar av kulturarven vår. Og ein stor del av tilfanget til folkemusikkarkiva våre er nettopp privatopptak av denne typen.

Sigbjørn Apeland

Sigbjørn Apeland er musikkvitar, musikar og fast meldar i Dag og Tid.