Drama, komedie

Regi: Mona J. Hoel

Skal dere gå allerede?

Med: Nicole Madeleine, Raymond Lorentzen, Mattias Cantzler
Kinofilm

Unge Elin (Nicole Madeleine) skal flytta inn i ei leilegheit som faren har kjøpt etter press frå barnevernet. Dei to klønete karane Raymond (Lorentzen) og Mattias (Cantzler) søkjer jobblukka som målarar i hovudstaden, og sidan Elin treng å få fiksa dei gusjegrøne veggane, tek dei på seg oppdraget trass i lusebetaling frå den kjipe faren hennar.

Virring

Det mest forvirrande i starten er ikkje den virrande kameraføringa, men kvifor regissør, manusforfattar og fotograf Mona J. Hoel har brukt så låg oppløysing. Ingen mobilkamera har vore så dårlege det siste tiåret. Også stilen til Elin er genuint avleggs, med tynt nappa augebryn, kvit magetopp og vide dansebukser – til og med eggekartongen er gamaldags.

Ah, Hoel har klypt saman materiale ho filma i 2008! får eg googla meg til i etterkant. Problemstillingane med å vera ungdom på skråplanet er kanskje tidlaus, men for meg bidreg dei filmatiske grepa berre til at Skal dere gå allerede? verkar datert på fleire måtar. For dei som vaks opp med Pelle og Proffen-duoen til Ingvar Ambjørnsen, blir det noko Døden på Oslo S over det heile. Men det var kanskje meininga? Eg vart iallfall mint på kor vanleg syn utslåtte narkomane på den berømte Plata utanfor nettopp sentralbanestasjonen var for berre ti–tolv år sidan, og kor fort ein gløymer.

Så 2000-talet

Filmen fungerer såleis godt til ettertanke og som mimrefilm for meg, men eg har mistanke om at det er fordi eg henger meg opp i klesstilen og sosiolekten til Elin og venene som er så ettertrykkeleg gatete og tidstypisk. Det er opplagde komiske element med dei to målarkameratane, som på sitt sjarmerande amatørvis set i gang med riving av tak og tapet. Nordnorske Raymond og svenske Mattias skal heilt tydeleg vera filmens comic relief, men også humoren verkar datert.

Eg får vibbar til filmane til Josef Fares (mest kjent for Jalla Jalla og Kopps), som var pop nokre år før Hoel spelte inn sin film. Samanlikninga står seg faktisk ikkje så verst, då filmane til Fares har ein djup varme i karakterane som også Hoel lukkast med å få fram, sjølv om dialogen mellom Mattias og Raymond framstår for konstruert til å flyta heilt.

Eg forstår at Hoel har hatt lyst å ferdigstilla prosjektet sitt frå 2008, men eg klarar ikkje rista av meg spørsmålet om kven dette er meint for. Som ungdomsfilm vil han ikkje kunna appellera, då ingen er meir kritiske til tidskoloritt enn ungdommane, og som vaksenfilm blir han for banal. Dei fleste kan setja pris på og bli rørte av den enkle, godsinna historia om dei jordnære karane som forbarmar seg over den vanskelegstilte jenta, utan baktankar og skumle hensikter. Dette kombinert med umoderne kulissar og foreviga med avdanka mobilutstyr klarar ikkje overtyda meg om kva som er intensjonen bak Skal dere gå allerede?. Så eg sit i grunnen framleis og er litt forvirra.

Brit Aksnes

Brit Aksnes er frilans kulturarbeidar og fast filmmeldar i Dag og Tid.