Kompani Stendahl på Vinterlysfestivalen

Linda Mathisen og Hilde Stensland:

Eventyrmysteriet

Regi: Hilde Stensland

Nok ein gong ser vi at det heilt enkle kan skape godt teater, i dette tilfellet barneteater som også talar til eit vakse publikum. For historia Hilde Stensland og Camilla Johannessen Dahl fortel, er enkel. Men dei to gjer framsyninga morosam, leiken og oppfinnsam.

To omstreifarar kjem vandrande og får lyst til å lese frå ei gammal eventyrbok dei ber med seg. Men så syner det seg at eventyret er forsvunne, sidene i boka er blanke. Eit ekte mysterium, altså. Då dei to gjev seg til å leite etter eventyret, med hjelp frå borna i salen, dukkar det opp igjen, bit for bit, på eit vis som får ungane til å tru at dei er med på å forme eventyret. Det er medskaping og tovegs kommunikasjon på høgt nivå, heilt utan elektroniske hjelpemiddel.

I jakta på forsvunne ord og setningar blir det mykje fysisk teater og grimasar. Særleg Hilde Stensland er god til å skape seg om. Stadig gjer dei feil, stadig må dei korrigere kvarandre, stadig oppstår komiske situasjonar. Og mykje av dette er like morosamt for vaksne som for dei framsyninga er laga for. Også språkleg er framsyninga prega av overskot og ordglede, slik òg gjøglargleda er merkbar den halvtimen dette tar. Fritt for overspel er det ikkje, men her betyr den slags mindre.

Jan H. Landro