Over Norge på Forum Scene

Jan Eggum, Hanne
Toreskås Aspheim:

En natt forbi. En Jan
Eggum-musikal

Regi: Lars Jacobsen
Musikalsk ansvarleg: Hans Einar Apelland
Kapellmeister: Bjarte Aasmul
Scenograf: Lise Christensen

Av trubaduren Jan Eggums rike låtkatalog kan det sikkert lagast fleire musikalar. Men dei som var først ute, har kunna velje frå øvste hylle – og då kan det ikkje gå gale.

Likevel kunne dei gjerne ha plukka litt færre songar og gitt kvar tekst større rom, no blir det mange snuttar. Men mykje av materialet er godt integrert i heilskapen, og sluttresultatet er blitt førsteklasses underhaldning. Nye vinklar på songane får vi ikkje, det var vel ikkje meininga heller.

Forviklingskomedie

Av denne typen musikalar ventar ein ikkje så mykje av manus, ut over songtekstane, jamfør Mamma Mia!. Men Hanne Toreskås Aspheim har sett songane inn i ein romantisk forviklingskomedie, som gir aktørane på scenen høve til å spele teater ved sida av å tolke songskatten.

Lettbeint, rett nok, men ofte morosamt og med gode poeng. Eit metaperspektiv er også bygt inn, ved at personane prøver å skaffe seg invitasjon til ein Eggum-konsert – der hovudpersonen etter kvart dukkar opp i eigen høge person, utan å ta over heile showet.

Alle dei kjende Eggum-temaa har fått plass i framsyninga, som især byggjer på det han skreiv på nittitalet, og då særleg albumet Nesten ikke tilstede, noko av det mest popprega i produksjonen hans.

Strålande vokaljobb

Sjølv om dei fleste songane er så «innsungne» med Eggum-sounden at det verkar rart å høyre andre tolke dei, gjer dei fem medverkande – Karoline Krüger, Christine Guldbrandsen, Bjarte Hjelmeland, Claus Sellevoll og Kristian Berg Jåtten – ein strålande vokaljobb i Hans Einar Apellands forsiktige musikkarrangement. Komediespelet beherskar dei òg, somme betre enn andre, rett nok.

Jan H. Landro

Jan H. Landro er forfattar, journalist og fast teatermeldar i Dag og Tid.