Teater
Formidabel vulgærversjon av Romeo og Julie
Kjersti Horn har laga ei imponerande, sjokkerande og frekk framsyning med framifrå prestasjonar.
Blikkontakten mellom Stine Robin Eskildsen og Ameli Isungset Agbota kan slå deg ut, skriv Jan H. Landro.
Foto: Den Nationale Scene
Kva skal ein gjere med Romeo og Julie i 2023, 430 år etter at stykket blei skrive? Det skildrar ei verd fjern frå vår, i høgttravande vendingar som veks seg uendeleg store i munnen på eit moderne menneske.
Alltid like kompromisslause Kjersti Horn går sin eigen veg og gjer noko eg aldri før har sett ein regissør gjere med denne teksten. Gjennom heile oppsetjinga skapar ho ein rytme der alvoret om og om igjen blir oppheva av humor og komikk, ofte grovkorna og overdriven. Og likevel får den formidable framsyninga det til å røske kraftig i nervesystemet. Innimellom er dette moderne B-film, full av blod og splatter, heilt rå i uttrykket og med valdsdyrkande ungdomsgjengar som henta ut av 2023. I denne framsyninga er moderniseringa teken heilt ut.
Fart og dynamikk
Her er dynamikk, rørsle og fart frå først til sist, med vekt på det fysiske uttrykket, sjølv om mykje er i form av renning opp og ned trapper, inn og ut dører i teaterhuset. Ein strid straum av populærkulturelle referansar gjer at framsyninga særleg vil appellere til eit ungt publikum, noko teatera heile tida er på jakt etter. Den Nationale Scene har fått Øyvind Berg til å lage ei heilt moderne omsetjing, som i sitt tidvis vulgære språk distanserer seg kraftig frå originalens høglyrikk – og samstundes held på poesien der det krevst. Det fungerer godt og yter eit viktig bidrag til heilskapen. Moderniseringa er så imponerande konsekvent gjennomført på alle nivå at det er berre å gi seg over.
Filma teater
Kjersti Horn har gjort filma teater til varemerket sitt som regissør. Vel å merke teater i sanntid, ikkje opptak. Publikum sit i salen og ser det som skjer på storskjerm, og får berre tidvis glimt av skodespelarane. Dette har mellom anna gitt oss den fabelaktige Raskolnikov-framsyninga for nokre år sidan. Ho ønskjer tydelegvis å hente ut det beste av to verder og kanskje lage eit nytt teaterspråk.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
