Teater Ibsen

Michel Houellebecq:

Underkastelse

Dramatisering, regi, musikk, korledelse, audiovisuelt konsept: Tore Vagn Lid
Scenografi: Mari Lotherington
Kostyme: Mathilda Söderling

Det skal han ha, Tore Vagn Lid, at når han tek på seg å dramatisere ein roman, i dette tilfellet Houellebecqs samfunnssatiriske Underkastelse, gjer han stoffet til sitt eige. Men likevel ikkje meir enn at det er godt attkjennande.

Vi er i Paris i 2022. Eit moderat islamsk parti har vunne presidentvalet, og François mister professoratet sitt i litteratur ved Sorbonne-universitetet. Livet hans dreier seg berre om den dekadente 1800-talsforfattaren Joris-Karl Huysmans og å erobre så mange kvinnelege studentar som råd. Så får han valet om å vende tilbake til det islamiserte universitetet, men på visse vilkår.

Stykket, og romanen, er ein indirekte kritikk av islam, men langt meir direkte kritikk av elitane i Frankrike (og resten av den vestlege verda), som er så ettergivande at dei heller bøyer av enn å ta strevet med å møte eit reaksjonært livssyn med ideologisk eller religiøs motstand.

Tore Vagn Lid har alltid svært mykje på hjarta, og helst i så mange medium som råd. Det gjer framsyninga noko kaotisk i byrjinga, men etter kvart vinn ho i klårleik. Han lar to skodespelarar, Stian Isaksen og Patrik A. Stenseth, dele på hovudrolla, og får slik fram splittinga i den noko stakkarslege François. Her er mykje å le av og mykje å gremje seg over, og tankevekkjande er framsyninga i aller høgste grad.

Jan H. Landro