Hordaland
Teater

Ruth Lillegraven, Eirik del Barco Soleglad, Tore Renberg, Gunnar Staalesen, Finn Tokvam, Bjørn Sortland, Solrun Toft Iversen, Mari Hesjedal, Ingrid Jørgensen Dragland, Sigrid Moldestad, Marit Eikemo, Frode Grytten:

Heim. Ei musikalsk
vestlandskrønike, del 2: 1975–1985

Regi: Eirik del Barco Soleglad
Scenografi og kostyme:
Lise Christensen
Musikkansvarleg:
Voksne Herrers Orkester

Andre del av Hordaland Teaters vestlandskrønike dekkjer tiårsperioden frå kvinneåret 1975 til etterverknadene av Alexander Kielland-tragedien og eit stykke kommunal korrupsjon. Dei tjue frittståande tablåa hentar fram tendensar, stemningar og akutte situasjonar, som då 123 menneske gjekk ned med havaristen Alexander Kielland. Eller på den positive sida: då Sogndal spelte cupfinale i 1976. At vinnaren, Brann, knapt er nemnd i innslaget, som avslører den sjølvopptekne pratmakaren utan evne til å lytte, gjer det berre endå betre.

Scenane er attkjennande, alle som ein, men somme manglar dette ekstra som skal lyfte dei frå attkjenning til noko meir. Eit høgdepunkt er Frode Gryttens «Nattope», om han – fint presentert av Claus Sellevold – som er ute og køyrer om natta, ei flukt frå noko det knapt finst flukt frå.

Sigrid Moldestad er ei berande kraft i framsyninga. Musikalsk veit vi jo kva ho kan, men ho taklar også skodespelardelen fint. På herresida tek Claus Sellevold dei tyngste børene, i eit format som passar talentet hans godt. Morten Svartveit er elles eit positivt tilskott, og 17 år gamle Amanda Haga debuterer med fine prestasjonar.

Jan H. Landro