Den Nationale
Scene, Lille Scene

Ane Skumsvoll:

Der går grensen!

Regi: Morten Joachim
Scenografi: Morten Joachim og Ane Skumsvoll
Komponist og musikalsk ansvarleg: Håkon Moe

Med utgangspunkt i eigne haldningar og slike ho har møtt hos andre, har skodespelar Ane Skumsvoll kokt i hop ein komedie om nabokrangel som har kvalitetar i seg til å bli ein klassikar. Ikkje berre tek ho oss gjennom katalogen av alt dette som kan irritere hos naboen, eller medreisande på buss og bane; ho leverer også strategiar for korleis ein skal møte det. Eller kanskje korleis ein ikkje skal møte det.

Teksten er ei salig blanding av element frå ei rad ulike sjangrar som i utgangspunktet ikkje skulle gå godt saman, men som i denne humørfylte, overskotsprega framsyninga går saman i ein spenstig einskap. Her er spranget frå ordinær komedie til dokumentar kort, og mellom dette ligg kanskje allsong eller andre former for interaktivitet, endåtil teaterdugnad.

Framsyninga tek oss i fleire retningar, og noko av det gode er at du aldri kan kjenne deg trygg på at du veit kor ferda går. I sentrum står ei meir enn velopplagt Ane Skumsvoll, som speler på alt ho har av komiske eigenskapar. Men det skal to til for å skape nabokrangel, og i sin musikalske skodespelarkollega Håkon Moe har ho den perfekte (og passe irriterande) motparten.

Der går grensen! har ein allmenn appell og er så god at både Riksteatret og andre scenar bør syte for at denne vesle perla når ut til alle hjørne av landet som visstnok har flest nabokranglar i heile verda.

Jan H. Landro