Folkemusikk

Andris A. Dahle:

Heime og austa åsen

Ta:lik

Folkemusikkarkivet til Norsk rikskringkasting er først og fremst basert på materiale som var tenkt til kringkasting, men i tillegg til musikken som faktisk vart kringkasta (oftast gjennom programposten Folkemusikkhalvtimen), finst det store mengder ukjent materiale – både song/spel og samtale – som er teke vare på. Eit høgdepunkt i dette materialet er dei ti CD-ane som var samla i boksen Norsk folkemusikk, som vart utgjeven av plateselskapet Grappa i 1995. Sidan har også Ta:lik gjeve ut mykje av folkemusikkmaterialet frå NRK-arkivet, og denne plata er eit kjærkome tilskot til denne kulturskatten.

Valdres er eit av dei områda i Noreg der mykje folkemusikk har vorte dokumentert, og framleis er det mange nolevande musikarar som held denne musikken i hevd – både songen og spelet (der hardingfele og langeleik er dei sentrale instrumenta).

Denne utgjevinga inneheld innspelingar hardingfelespelaren Andris A. Dahle (1925–1995) gjorde for NRK i perioden 1972 til 1990. Det meste av musikken har han etter Ola G. Okshovd og bestefaren Ivar Ringestad. Det som særmerkjer spelet hans – anten det er tale om springarar eller lydarslåttar – er ein imponerande klårleik, med ein unik kombinasjon av konsentrert kontroll og frisk energi.

Totalt sett er dette eit stort dugnadsarbeid der mange NRK-tilsette – i tillegg til plateselskapet – har medverka, men produsentane Rolf Myklebust (som stod for opptaka frå 70-talet) og etterfylgjaren Leiv Solberg (som stod for dei seinare opptaka) lyt særleg nemnast.

Og dei som dessutan er interesserte i detaljkunnskap om alt dette, har mykje å finna i tekstmaterialet som fylgjer utgjevinga.

Sigbjørn Apeland

Sigbjørn Apeland er musikar, musikkvitar og fast meldar i
Dag og Tid.