Spelmusikk

Oda
Tilset,
Sigur Rós

Snusmumrikken: Melodien i Mummidalen

Raw Fury / Noknok Audio

Snusmumrikken: Melodien i Mummidalen er eit spel med musikk i sentrum. Det er utvikla av norske Hyper Games, og musikken er komponert av Oda Tilset med bidrag frå det islandske postrockorkesteret Sigur Rós.

Komposisjonane til Oda Tilset er minimalistiske og avslappande. Hovudtemaet byggjer variasjonar kring ein roleg melodi, framført på omgang med silkemjuke fløyter, fyldig kassegitar og romsleg melodisk perkusjon, krydra med fredsæl, forsiktig, men kontant slagverk. Sjølvsikre pianotriller og stakkato stryk blandar seg inn i den fredfulle sildringa i den jamne lydrøra.

Mummidalen er jo ein frodig stad, og her kan ein formeleg høyre graset gro og blomane opne kronblada i morgondogg, fager kveldsol og skimrande måneskin – samstundes. Dette er musikk som nullar ut tidsoppfatninga; eg synest eg høyrer ein og annan underleg synthtone her og der, men uansett korleis lydbileta er konstruerte, er dei dominerte av akustiske instrumentlydar. Likevel minner den tilbakehaldne, presise stilen og rolege stemninga om Haruomi Hosonos legendariske bakgrunnsmusikkstykke frå 1984, Watering A Flower.

Sigur Rós er å høyre i endestykka, framom og bak. Og dei songane der får tidsoppfatninga til å gå i stå. Dei er beint fram gørr keisame – slik er det no for det meste med Sigur Rós’ spake, pompøse stil, overaust av vasne gitareffektar og utruverdig lidande tenåringsfurtevokal. Heldigvis er dette ein liten del av lydsporet til Snusmumrikkens digitale vandring. Han skulle forresten ha fått seg eit reinare munnspel, for det der skjer skarpt i mine lytteorgan.

Rasmus Hungnes

Rasmus Hungnes er kunstnar, musikar og fast musikkmeldar i Dag og Tid.