Jazz

Arve Henriksen / Harmen Fraanje:

Touch of Time

Arve Henriksen, trompet
og elektronikk; Harmen
Fraanje, piano. ECM

Ti studiar i melankoli

Duoen overraskar ikkje, men leverer noko viktig.

Fraanje og Henriksen møttest til ein konsert med improvisert musikk på Transitionfestivalen i Utrecht i 2019, og ifølgje Fraanje skjøna dei båe at dette berre var byrjinga. Touch of Time stadfester dette. Duoen har absolutt noko å melda.

Bodskapen overraskar ikkje, men er fascinerande på eit stadfestande vis. Plata er spelt inn i studioet i Lugano som ECM nyttar ofte. Manfred Eicher er produsent, og lyden er stroken frå første til siste tone.

Plata er sett saman av ti studiar i melankoli. Opningssporet heiter faktisk «Melancholia» og set standarden. Konserten i 2019 var improvisert. Her har dei teke utgangspunkt i det dei kallar kompositoriske «rammeverk». Tre låtar har dei arbeidd ut saman, men dei andre sju er førte i pennen av Fraanje. «The Beauty of Sundays», ein Fraanje-låt, kunne med ein tekst og litt musikalsk makeup blitt ein hit. Også «Passing on The Past» har eit forførande tema. All musisering går i ettertenksame tempo.

Det absolutte høgdepunktet på plata er den mest ni minuttar lange «Redream», som dei har skrive i lag. Ikkje berre har komposisjonen eit karakteristisk tema, men dei utviklar eit musikalsk forløp som inneheld temavariasjonar, mellomspel på piano og ein sekvens elektronikk som introduserer eit mørker det ikkje finst så mykje av på plata elles.

Når dei vender attende til temaet, er det ikkje emosjonelt på same staden dei byrja. Det er noko logisk naudsynt over kuttet som følgjer, «The Dark Light». Fraanje og Henriksen har levert som forventa, men me tek gjerne ein runde til.

Lars Mossefinn

Lars Mossefinn er frilans journalist og fast jazzmeldar i Dag og Tid.