Samisk indie

Lávre:

Vulozat

Fierran Records

«Samisk indie» er forslaget Lávre Johan Eira har til kategorisering av musikken sin. Musikken er rett nok utgjeven på eit uavhengig (independent) plateselskap, men elles har dette lite til felles med det rufsete elgitarprega lydbiletet som ofte karakteriserer indierocken.

Her er det derimot eit gjennomført mjukt og vennleg lydbilete som dominerer, og det sentrale tradisjonselementet joik vert sett saman med lydbilete prega av akustiske gitarar og elektroniske klangflater, ofte drivne fram av bassist Svein Schulz og perkusjonist Jakop Janssønn. Dei to har òg produsert plata. Av og til tilfører det luftige trompetspelet til Ole Jørn Myklebust eit diskré preg av moderne jazz.

Lavir

Det er slett ikkje alltid møtet mellom tradisjonelle element og instrumentering/stiltrekk frå jazz/pop/rock fungerer like godt. Det er eit problem innan mykje av den nyare folkemusikken/verdsmusikken at gamalt og nytt ikkje smeltar saman på truverdig vis, men vert ståande som parallelle element. Men slik er det ikkje her. Det er ei ro over produksjonen som gjer at det totale lydbiletet framstår som ein heilskap, der vokalt uttrykk, akustiske og elektriske element ikkje stangar mot kvarandre, men underbyggjer kvarandre.

Lávre skriv på omslaget at han er oppteken av å plassera seg i ein joiketradisjon inspirert av oldefaren, som i arkivopptak opnar plata, samstundes som han vil vera ein nyskapande musikar i samtida – ein ambisjon ein ofte møter blant yngre tradisjonsmusikarar. Dette er ei overtydande debutplate, og det skal verta spanande å fylgja Lávre vidare på den musikalske reisa.

Sigbjørn Apeland

Sigbjørn Apeland er musikar, musikkvitar og fast musikkmeldar i Dag og Tid.