Folkemusikk / Jazz

Nils Økland Band:

Gjenskinn

Nils Økland fele, hardingfele; Sigbjørn Apeland, harmonium og Fender Rhodes; Rolf-Erik Nystrøm, saksofonar; Håkon Mørck Stene, perkusjon, vibrafon, elektronikk; Mats Eilertsen, bass. Hubro Records

Fiolinisten Nils Økland er ein av dei mest spanande fiolinistane me har i Noreg. I tillegg har han blitt eit førebilete for fleire av dei yngre musikarane på hardingfele, som ikkje har følt seg heilt heime i den tradisjonelle folkemusikken.

Frå starten, med det litt prøvande felespelet i «Minimalvals», der han saman med Eilertsen gjer denne til den perfekte innleiinga, til avslutninga «Silhuett» legg han lista svært høgt. Øklands spel har heile vegen den tyngste foten i folkemusikken og den andre i jazzen og improvisasjonsmusikken.

Nils Økland Band.

Foto: Ellen Ane Eggen

Spelet er mystisk, mytisk, vakkert og kreativt, som kom spelet frå det underjordiske, og med Eilertsen som støttespelar framfor nokon blir dette ei høgtidsstund. Nystrøms saksofonar leikar seg høgt og lågt, og han legg heile tida inn spanande innspel som lyfter musikken. Og Stenes perkusjon og vibrafon, og innimellom velretta elektronikk, skapar ein heilskap i musikken som går utanpå det meste me har høyrt av slik musikk tidlegare.

Økland leier ensemblet med stor overtyding, og dei andre musikarane legg seg tett på bandleiaren og følgjer tankane hans frå start til mål, som om dei kan lesa tankane hans, anten han omskapar det norske eller det egyptiske, irske eller det fritt improviserte. Utgjevinga er fullstappa med nydeleg spel som gjer musikken global.

Økland og venene hans har laga ei perle av ei plate.

Jan Granlie

Jan Granlie er redaktør av nettidsskriftet salt peanuts* og frilans musikkskribent.