Bok
Kuratoren, kunstnaren og det ekte livet
Safae el Khannoussi debuterer med eit fyrverkeri av ein roman.
Safae el Khannoussi (f. 1994) er ein marokkansk-nederlandsk forfattar og politisk filosof busett i Amsterdam.
Foto frå Cappelen Damm
Det
er ikkje ofte at ein debutroman slår verk av samtidige etablerte forfattarar
ned i støvlane, men det gjer Oroppa av marokkansk-nederlandske Safae el
Khannoussi (fødd 1994). Her har me å gjera med ein forfattar som har suveren
kontroll over alt i ei tettskriven bok der ho er på heimebane i skildringa av
folk som er på evig turné mellom bortebanene i livet.
Det meste av teksten
handlar om marokkanarar i europeisk eksil i Amsterdam og Paris, men romanen
tek også avstikkarar til Marokko og Tunisia, fram og attende i tida, mellom
kunstnarar, fyllikar, torturistar og andre turistar.
Skuggesida
Det eigentlege plottet er freistnaden på å
få fatt i biletkunstnaren Salomé Abergel, som også vert kalla Salma. Kuratoren
hennar i Amsterdam, Hannah Melger, er desperat etter å finna Salma, for det
skal snart vera ei stor utstilling, og kunstnaren bør helst vera med. Dessutan
er det nokre fenomenale måleri som kuratoren ikkje har lokalisert. Med dette
utgangspunktet, fortalt med avstikkarar i alle retningar, opnar forfattaren for
ei brei og fargesterk skildring av livet på skuggesida av Vest-Europa, og
skuggen dette livet finn stad i, er av det postkoloniale Marokko.
I ungdomsåra vart Salma arrestert og
torturert i Casablanca då staten freista å slå ned eit mogleg
opprør. Mange år seinare dukkar ein av torturistane opp utanfor døra til
Salomé, utan at han har nokon tydeleg plan med ein slik konfrontasjon.
Handlinga rører seg hit og dit, ho haikar
med ei rad bipersonar som alle har samband med personane sentralt i romanen.
Forfattaren har meisterlege miljøskildringar og får med seg detaljar som gjer
forteljingane overtydande, og ho tek aldri omsyn til lesaren. Teksten har si eiga retning, slik eit vassdrag har det, og vekslar mellom stryk og fossefall,
kulpar og bakevjer, over stokk og stein og somme tider ut i sanden.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
